ވޮލީބޯލް އެސޯސިއޭޝަން ކަޕްގެ ފިރިހެން ޑިވިޝަންގެ ފުރަތަމަ ޖާގަ ސިޓީ ސްޕޯޓްސް ކްލަބުން ކަށަވަރުކޮށްފިއެވެ. އެ ޓީމު ފައިނަލަށް ދަތުރުކުރީ ސެމީ ފައިނަލް ދެވަނަ މެޗުގައި ކްލަބް އާބަންކޯ ބަލިކޮށްގެނެވެ.

މި މެޗުގައި އެންމެ ވާދަވެރިކޮށް ފެނިގެން ދިޔަ ފުރަތަމަ ސެޓު ކާމިޔާބުކުރީ ސިޓީ ސްޕޯޓްސް ކްލަބުންނެވެ. އެއީ 30 ޕޮއިންޓު 28 ޕޮއިންޓުންނެވެ. އެއަށްފަހު ދެވަނަ ސެޓު ގެންދިޔައީ 25-22 އިން އާބަންކޯއެވެ. 

ސިޓީ ސްޕޯޓްސް ކްލަބުން މެޗު ކާމިޔާބުކުރީ 25-15 އަދި 25-20 އިން ފަހު ދެ ސެޓު ކާމިޔާބުކޮށް، 3 ސެޓު 1 ސެޓުންނެވެ. މެޗުގެ މޮޅު ކުޅުން ތެރިއަކަށް ހޮވުނީ ސިޓީ ސްޕޯޓްސް ކްލަބްގެ ޖާޒީ ނަމްބަރު 9، އޮމަރްބެކް ޒުނުސޯވްއެވެ.

ތިން ސެމީ ފައިނަލް ކުޅުމަށް ހަމަޖެހިފައިވާ މި މުބާރާތުގެ ދެވަނަ ސެމީގައި ބައްދަލުކުރީ ދެ ގްރޫޕުން އެއް ވަނައަށް ދިޔަ ދެ ޓީމެވެ. އެގޮތުން މި މެޗުން ބަލިވި ނަމަވެސް އާބަންކޯއަށް ފުރަތަމަ ސެމީ އިން މޮޅުވި ޓީމާ ތިން ވަނަ ސެމީގައި ބައްދަލުކޮށް، ފައިނަލުން ޖާގަ ހޯދިދާނެ ފުރުސަތު އެބައޮތެވެ. 

އިއްޔެ ހަވީރު ކުޅުނު މުބާރާތުގެ ފުރަތަމަ ސެމީގައި ބައްދަލުކުރީ ދެ ގްރޫޕުން ދެ ވަނަ ހޯދި ކްލަބް ވެމްކޯއާއި ސްޕޯޓްސް ކްލަބް ސިޓީއެވެ. މި މެޗު ސީދާ 3 ސެޓުން ކާމިޔާބުކޮށް، ތިން ވަނަ ސެމީއިން ޖާގަ ހޯދާފައިވަނީ ވެމްކޯއެވެ. 

ވެމްކޯއިން މެޗުގެ ފުރަތަމަ ސެޓު ކާމިޔާބުކުރީ 25-22 އިންނެވެ. އަދި ދެ ވަނަ ސެޓާއި ފަހު ސެޓު ކާމިޔާބުކުރީ 25-20 އަދި 25-19 އިންނެވެ. މެޗުގެ މޮޅު ކުޅުންތެރިއަކަށް ހޮވުނީ ވެމްކޯގެ ޑިއެގޯ މެތިއުޒްއެވެ.

މުބާރާތުގެ ތިން ވަނަ ސެމީ އޮތީ މިރޭ 8:15 ގައެވެ. މި މެޗުގައި ބައްދަލުކުރާނީ ކްލަބް ވެމްކޯ އާއި ކްލަބް އާބަންކޯއެވެ. މި މެޗު ކާމިޔާބުކުރާ ޓީމަކަށް ފައިނަލްގެ ދެވަނަ ޖާގަ ލިބޭނެއެވެ.