ހުޅުމާލެއިންވެސް ފައިލޭރިއާއަށް ޕޮޒިޓިވް މީހަކު ފެނުމާއި ގުޅިގެން، މާލެ ސަރަހައްދުގައި އިތުރު ސްކްރީނިން ޕްރޮގްރާމްތަކެއް ކުރިޔަށް ގެންދިޔުމަށް ނިންމާފައިވާ ކަމުގައި ހެލްތު ޕްރޮޓެކްޝަން އޭޖެންސީ އެޗްޕީއޭއިން ބުނެފިއެވެ.

އެޗްޕީއޭއިން ބުނީ، ހުޅުމާލެ އާއި ވިލިމާލެ އަދި ތިލަފުށީގައި ފައިލޭރިއާއަށް ސްކްރީން ކުރުމަށް ތައްޔާރުވަމުންދާ ކަމަށާއި، ދުނިޔޭގެ ސިއްޙަތު ޖަމިއްޔާ އާއި ގުޅިގެން ފައިލޭރިއާ ޓެސްޓްކިޓް ހޯދުމުގެ މަސައްކަތް ކުރަމުން އަންނަ ކަމަށެވެ.

މީގެ އިތުރުން މަދިރި ކޮންޓްރޯލް ކުރުމުގެ ޕްރޮގްރާމްތަކާއި، ފައިލޭރިއާއަށް އާއްމުން ހޭލުންތެރި ކުރުވުމުގެ ޕްރޮގްރާމްތައް ކުރިޔަށް ގެންދިޔުމަށް ރާވާފައިވާ ކަމުގައި އެޗްޕީއޭއިން ވަނީ ބުނެފައެވެ.

އެޗްޕީއޭއިން ބުނީ، ހުކުރު ދުވަހު ހުޅުމާލެއިން ފައިލޭރިއާއަށް ޕޮޒިޓިވްވެފައިވާ މީހުންނަކީ، މައިގްރޭޓް ފެއާގައި ފައިލޭރިއާއަށް ޓެސްޓްކުރި 13 މީހުންގެ ތެރެއިން އެކަކު ކަމަށެވެ. ހުޅުމާލެ އާއި މާލެ އަދި ވިލިމާލެއާ ތިލަފުށީގައި ވަރަށް ގިނަ އަދަދެއްގެ ބިދޭސީން ދިރިއުޅޭއިން، ޓެސްޓް ކުރެވުނު 13 މީހުންގެ ތެރެއިން އެކަކު ޕޮސިޓިވްވުމަކީ ނިސްބަތުން ވަރަށް ބޮޑު އަދަދެކެވެ.

އެޗްޕީއޭއިން ހާމަކޮށްފައިވާ ގޮތުގައި މިހާތަނަށް ރާއްޖެއިން ޖުމުލަ 26 މީހަކު ވަނީ ފައިލޭރިއާއަށް ޕޮޒިޓިވްވެފައެވެ. އެ އެންމެންނަކީވެސް ބިދޭސީން ކަމަށާއި، އަދި އެމީހުން ރާއްޖެ އައިސްފައި ވަނީ، ފައިލޭރިއާ ފެތުރެމުން އަންނަ، އިންޑިއާ އާއި ބަނގުލަދޭޝްގެ ސަރަހައްދުތަކުން ކަމުގައިވެސް އެޗްޕީއޭއިން ވަނީ ފާހަގަކޮށްފައެވެ.