މާލޭގައި މިހާރު ކުރިޔަށްދާ ވޮލީބޯލް އެސޯސިއޭޝަން ކަޕުގެ ފިރިހެން ޑިވިޝަނުގެ ސެމީ ފައިނަލް މެޗުތައް ސޯޝަލް ސެންޓަރުގެ އިންޑޯ ކޯޓުގައި މިއަދު ފަށާނެއެވެ. މި މުބާރާތުގައި 3 ސެމީފައިނަލް ކުޅުމަށް ހަމަޖެހިފައިވާއިރު، ފުރަތަމަ ދެ ސެމީ ކުޅޭނީ މިއަދުއެވެ. އަދި ފަހު ސެމީ އޮންނާނީ މާދަމާއެވެ.

މުބާރާތުގެ ފުރަތަމަ ސެމީގައި ބައްދަލު ކުރާނީ 2 ގްރޫޕުން ވެސް ދެވަނައަށް ދިޔަ ޓީމުތަކެވެ. އެގޮތުން އެ މެޗުގައި ބައްދަލު ކުރާނީ ކްލަބް ވެމްކޯ އާއި ސްޕޯޓްސް ކްލަބް ސިޓީއެވެ. މި މެޗު ކުޅުމަށް ހަމަޖެހިފައިވަނީ ހަވީރު 4:15 ގައެވެ.

ސްޕޯޓްސް ކްލަބް ސިޓީ ސެމީއަށް ދަތުރުކުރީ ކުޅުނު 2 މެޗުގެ ތެރެއިން 1 މެޗު ކާމިޔާބުކޮށް 3 ޕޮއިންޓު ހޯދާ، ޕޫލް-2 ގެ ދެވަނަ ޓީމުގެ ގޮތުގައެވެ. ވެމްކޯ ސެމީއަށް ދަތުރު ކުރީ ޕީލް-1 ގެ ދެވަނަ ޓީމުގެ ގޮތުގައެވެ. ވެމްކޯއިން ވަނީ ގްރޫޕް ސްޓޭޖުގައި އެއް މެޗުން މޮޅުވެ، 3 ޕޮއިންޓު ހޯދާފައެވެ.

ދެވަނަ ސެމީގައި ބައްދަލުކުރާނީ 2 ގްރޫޕުން އެއްވަނަ ލިބުނު ޓީމުތަކެވެ. އެއީ ކްލަބް އާބަންކޯ އާއި ސިޓީ ސްޕޯޓްސް ކްލަބެވެ. އާބަންކޯ ސެމީއަށް ދަތުރުކޮށްފައިވަނީ 4 ޕޮއިންޓާއެކު ޕޫލް-1 ގެ އެއްވަނަ ހޯދައިގެންނެވެ. އަދި ސިޓީ ސްޕޯޓްސް ކްލަބް ޕޫލް-2 ގެ އެއްވަނަ ޓީމުގެ ގޮތުގައި ސެމީއަށް އައީ ގްރޫޕް ސްޓޭޖުގެ 2 މެޗު ކާމިޔާބުކޮށް 6 ޕޮއިންޓު ހޯދައިގެންނެވެ. މި މެޗު ކުޅޭނީ މިރޭ 8:15 ގައެވެ.

ފަހު ސެމީ ކުޅުމަށް ހަމަޖެހިފައިވަނީ މާދަމާރޭ 8:15 ގައެވެ. އެ މެޗުގައި ބައްދަލު ކުރާނީ ފުރަތަމަ ސެމީއިން މޮޅުވާ ޓީމަކާއި ދެވަނަ ސެމީއިން ބަލިވާ ޓީމެވެ.

މި މުބާރާތުގެ ފައިނަލް ކުޅުމަށް ހަމަޖެހިފައިވަނީ މި މަހުގެ 26 ވާ އަންގާރަ ދުވަހުގެ ރެއެވެ.