މާލޭ ސޯޝަލް ސެންޓަރުގެ އިންޑޯ ކޯޓުގައި މިހާރު ކުރިޔަށްދާ ވޮލީބޯލް އެސޯސިއޭޝަން ކަޕުގެ އަންހެން ޑިވިޝަނުގެ ފައިނަލަށް ޕޮލިސް ކްލަބާއި ކްލަބް ވެމްކޯ ދަތުރުކޮށްފިއެވެ.

ހުކުރު ދުވަހުގެރޭ ކުޅުނު ފުރަތަމަ ސެމީ ފައިނަލް މެޗުގައި ބައްދަލުކޮށްފައިވަނީ ޕޮލިސް ކްލަބާއި ވޮލީބޯލް އެކަޑަމީ އޮފް މޯލްޑިވްސްއެވެ. މި މެޗު ފަސޭހަ ކަމާއެކު ޕޮލިސް ކްލަބުން ކާމިޔާބުކުރީ، ސީދާ ތިން ސެޓުންނެވެ.

އެގޮތުން ޕޮލިސް ކްލަބުން ފުރަތަމަ ސެޓު ކާމިޔާބު ކޮށްފައިވަނީ 25-8 އިންނެވެ. އަދި ދެވަނަ ސެޓު 25-13 ކާމިޔާބުކުރިއިރު، ފަހު ސެޓު ގެންގޮސްފައިވަނީ 25-13 އިންނެވެ. މެޗުގެ މޮޅު ކުޅުންތެރިއަކަށް ހޮވިފައިވަނީ ޕޮލިސް ކްލަބްގެ ހައްވާ ރާޝިދާއެވެ.

ދެވަނަ ސެމީ ފައިނަލް މެޗު ދިޔައީ ވަރަށް ވާދަވެރިކޮށެވެ. މި މެޗުގައި ބައްދަލުކުރީ އަލްމާ ސްޕޯޓްސް ކްލަބާއި ކްލަބް ވެމްކޯއެވެ.

ފުރަތަމަ ސެޓު 25-23 އިން އަލްމާ ކާމިޔާބުކުރިއިރު، ދެން ހުރިހާ ސެޓެއް ގެންދިޔައީ ވެމްކޯއެވެ. އެއީ 26-24، 25-23 އަދި 25-20 އިންނެވެ. މެޗުގެ މޮޅު ކުޅުންތެރިއަކަށް ހޮވިފައިވަނީ ވެމްކޯގެ ޖެސިކާއެވެ.

މުބާރާތުގެ ފައިނަލް ކުޅުމަށް ހަމަޖެހިފައިވަނީ 25 ޑިސެމްބަރު ވާ ހޯމަ ދުވަހުގެރޭ 8:15 ގައެވެ.