އައްޑޫ ސިޓީގައި މޫދަށް އެރި އެޅެނިކޮށް ގެއްލުނު މުޙައްމަދު ނައީޝް ހޯދުމަށް ކުރަމުން އަންނަ މަސައްކަތުން މިހާތަނަށް އޭނާ ފެނިފައި ނުވާކަމުގައި އެމްއެންޑީއެފުން ބުނެފިއެވެ.

އެމްއެންޑީއެފުން ބުނީ، ނައީޝް ހޯދުމަށްޓަކައި، އެމްއެންޑީއެފް ސަދަން އޭރިއާ ކޮމާންޑް، ކޯސްޓްގާޑް ފޯތު ސްކޮޑްރަންއިން ކުރިއަށްގެންދާ ޚާއްޞަ އޮޕަރޭޝަންގައި ކަނޑުގެމަގުންނާއި ވައިގެ މަގުން އަދި ޑައިވްކޮށްގެން ވަނީ ބޮޑު ސަރަހައްދެއް ބަލާފައި ކަމަށެވެ.

އެމްއެންޑީއެފުން ބުނީ، މުޙައްމަދު ނައީޝް ހޯދުމަށް ސިފައިން ކުރަމުންދާ މަސައްކަތަށް އެހީތެރިކަން ފޯރުކޮށްދިނުމުގައި ފުލުހުންނާއި ސ.މަރަދޫއަށް ނިސްބަތްވާ ތިން މަސް ދޯންޏަކުން ވަނީ މިއަދު އެ ސަރަަހައްދުގައި ހަރަކާތްތެރިވެފައި ކަމަށެވެ. މީގެ އިތުރުން މޯލްޑިވިއަންގެ ފްލައިން ސްކޫލުގެ ކުޑަ މަތިންދާ ބޯޓެއް ބޭނުންކޮށްގެން ވައިގެމަގުން އެސަރަހައްދު ވަނީ ބަލާފައެވެ.

އިއްޔެރޭ ނައީޝް ގެއްލުނީ، އިތުރު ބަޔަކާއި އެކު އޭނާ ފަރުމައްޗަށް ފީނައިގެން އިހި ނަގަން އުޅުމުގެ ތެރޭގެ ތެރޭގައެވެ. އުމުރުން 18 އަަހަރުގެ ނައީޝްއަކީ އައްޑު ހައި ސްކޫލުގައި މަތީ ޘާނަވީގައި ކިޔަަވަމުން އައި ދަރިވަރެކެވެ.