މާލޭ ސިޓީ ކައުންސިލުގެ މޭޔަރާއި، ހުސްވެފައިވާ ގޮނޑިތަކަށް މެންބަރުން އިންތިޚާބުކުރުމަށް ބާއްވާ ބައި-އިލެކްޝަނުގައި ވޯޓުލާ މަރުކަޒުތަކުގައި ހަރަކާތްތެރިވާނެ އޮފިޝަލުން ހޯދުމަށް އިލެކްޝަންސް ކޮމިޝަނުން ހުޅުވާލައިފިއެވެ.

އިލެކްޝަންސް ކޮމިޝަނުން ވިދާޅުވީ، މި 2 ބައި-އިލެކްޝަނުގައި 58 ފޮށްޓެއް ބެހެއްޓުމަށް ނިންމާފައިވާކަމަށެވެ. އެއީ މާލޭ ސިޓީ ކައުންސިލުގެ ބައި-އިލެކްޝަނަށް ޚާއްސަކޮށް މާލެ، ވިލިމާލެ އަދި ހުޅުމާލޭގައި ބަހައްޓާ 55 ފޮށްޓަކާއި، މުލަކު ޑަބްލިއުޑީސީ ބައި-އިލެކްޝަނަށް ޚާއްސަކޮށް މުލަކާއި މާލޭގައި ބަހައްޓާ 3 ފޮށްޓެކެވެ.

ޖަނަވަރީ 13 ވާ ހޮނިހިރު ދުވަހު ބާއްވާ މި 2 ބައި-އިލެކްޝަންގައި ވޯޓުލާ މަރުކަޒުތަކުގައި ހަރަކާތްތެރިވުމަށް ގާތްގަނޑަކަށް 350 އެއްހާ އޮފިޝަލުން ބޭނުންވާ ކަމަށް އީސީން ވިދާޅުވިއެވެ. އޮފިޝަލުންނަށްވުމަށް ޝަޢުގުވެރިވާ ފަރާތްތަކަށް މިހާރު އެ ފުރުޞަތު ހުޅުވާލާފައިވާއިރު، މިމަހުގެ 23،24 ގައި ދަރުބާރުގޭގައި އިލެކްޝަންސް ކޮމިޝަނުން ބާއްވާ ޖޮބް-ފެއަރގެ ތެރެއިންވެސް މިކަމަށް ކުރިމަތިލެވޭނެއެވެެ.  

މާލޭ ސިޓީގެ މޭޔަރާއި، ހުސްވެފައިވާ ގޮނޑިތަކަށް މެންބަރުން އިންތިޚާބުކުރުމަށް ބައި-އިލެކްޝަން އޮންނާނީ ޖަނަވަރީ 13 ވާ ހޮނިހިރު ދުވަހުއެވެ. ހަމަ އެ ދުވަހު މި ބައި-އިލެކްޝަންގެ އިތުރުން މ. މުލަކު އަންހެނުންގެ ތަރައްޤީއަށް މަސައްކަތް ކުރާ ކޮމެޓީއަށް މެންބަރު ހޮވުމަށް ބާއްވާ ބައި-އިލެކްޝަންވެސް އޮންނާނެއެވެ.