މިސަރުކާރުގެ ބޯހިޔާވަހިކަމުގެ އެންމެ ބޮޑުމަޝްރޫއަށް ފުށިދިއްގަރު ފަޅުން ހިއްކަނީ، އެމަސައްކަތްކުރާ، ސްރީލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ (ސީއެމްސީ) 70 ހެކްޓަރުުގެ ބިން ހިލޭދޭ ގޮތަށް ކަމުގައި އާބަންކޯއިން ބުނެފިއެވެ.

އާބަންކޯއިން ބޭއްވި ނޫސްވެރިންގެ ބައްދަލުވުމުގައި އެކުންފުނގެ މެނޭޖިންގ ޑައިރެކްޓަރު ފަޒުލް ރަޝީދު ވިދާޅުވީ، އެމަޝްރޫޢުގެ ބަދަލެއްގެ ގޮތުން ސީއެމްސީއަށް ދޭން ނިންމާފައި ވަނީ، ހުޅުމާލެއިން 10 ހެކްޓަރު އަދި ފުށިދިއްގަރުފަޅުން ހިއްކާބިމުން 60 ހެކްޓަރުގެ ބިންކަމަށެވެ. އެބޮޑު މިނަށް ބަލާނަމަ އެއީ މާލޭގެ އެއް އަވަށްކަމުގައިވާ ވިލިމާލޭގެ ތިން ވިލިމާލެ އެއްކޮލުމުން އޮންނަ ވަރުގެ ބޮޑުބިމެކެވެ.

ފަޒުލް ވިދާޅުވީ، ފުށިދިއްގަރުފަޅުން ހިއްކާ ބިމުން އެކުންފުންޏަށް ލިބޭނީ، 1093 ހެކްޓަރުގެ ބިންކަމަށެވެ. އަދި ސީއެމްއެމްސީއަށް ދޭ 70 ހެކްޓަރުގެ ބިންދެނީ އެކުންފުނިން އެހެން ފަރާތްތަކަށް އެބިމުން ބިންތައް ވިއްކައި ތަރައްޤީކުރެވޭގޮތަށް 99 އަހަރަށް ކަމުގައިވެސް އޭނާ ވިދާޅުވިއެވެ.

Advertisement

ފުށިދިއްގަރުފަޅު ހިއްކުމުގެ ބިޔަ މަޝްރޫޢު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފައްޓަވައި ދެއްވީ، މިދިޔަ ހޯމަދުވަހުއެވެ. އެމަޝްރޫއާ ގުޅޭ މައުލޫމާތު އާބަންކޯއިން ހާމަކޮށްފައި މިވަނީ އެމަޝްރޫޢާއި މެދު އެކިފަރާތްތަކުން ތަފާތު އެކި ގޮތްގޮތަށް ވާހަކަދައްކައި ސުވާލުތައް އުފައްދަމުން ދަނިކޮށެވެ.