ހދ. ކުޅުދުއްފުށީގައި ޓޫރިޒަމް ޒޯނެއް ތަރައްގީކުރުމަށް އިންވެސްޓަރުން ހޯދަން އެހީތެރިވުމަށް އެ ރަށު ކައުންސިލާ އެކު ރީޖަނަލް އެއާޕޯޓްސް ކޮމްޕެނީ (އާރުއޭސީއެލް) އިން އެއްބަސްވުމެއްގައި ސޮއިކޮށްފިއެވެ.

މި އެމްއޯޔޫގައި ސޮއިކޮށްފައި ވަނީ، އާރުއޭސީއެލްގެ މެނޭޖިން ޑިރެކްޓަރު އަހުމަދު މުބީން ކުޅުދުއްފުއްޓަށް ކުރެއްވި ދަތުރުގައި ކައުންސިލްގެ މެމްބަރުންނާ އެކު ބޭއްވެވި ބައްދަލުވުމެއްގައެވެ.

އާރުއޭސީއެލް އިން ބުނީ މި އެމްއޯޔޫގެ ދަށުން އެއާޕޯޓާ އިންވެގެން ކުޅި ހިމެނޭހެން އުތުރަށް އޮތް ހުސް ބިމުގައި ޓޫރިޒަމް ޒޯނެއް ތަރައްގީކުރުމަށް ހަމަޖެހިފައިވާކަމަށެވެ. އަދި ޓޫރިޒަމް ޒޯން ތަރައްގީކުރުމަށް ބޭނުންވާ ފައިސާ ނުވަތަ އިންވެސްޓަރުން ހޯދުމުގައި އާރުސީއެލް އިން މަސައްކަތް ކުރާނެކަމަށެވެ.

މި މަޝްރޫއުގެ އެންމެ މައިގަނޑު އެއް ބޭނުމަކީ، މި ވަގުތު އެ ބިމަކީ ބޭނުމެއް ނުކުރެވި އޮތް ހުސް ބިމަކަށް ވާތީ އާއި ކުޅުދުއްފުއްޓަށާ އަދި ކުޅުދުއްފުށީގެ ރައްޔިތުންނަށް ވެސް އެންމެ މަންފާކުރާނެ މަޝްރޫއެއް އެ ބިމުގައި ކުރުންކަމަށް ރީޖަނަލް އެއާޕޯޓްސް ކޮމްޕެނީން ވަނީ ބުނެފައެވެ.