ރައްޔިތުންގެ ސުވާލުތަކަށް ޖަވާބު ދިނުމަށް ޕަބްލިކް ފޯރަމްތަކެއް ބާއްވާނެ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، އެމަނިކުފާނު މިހެން ވިދާޅުވީ ރޭ ކުރިއަށްދިޔަ "ކަންގަތި އެވޯޑް 2023" ދިނުމުގެ ޙަފުލާގައި ދެއްކެވި ވާހަކަފުޅުގައެވެ.

ރައީސުލްޖުމްހޫރިއްޔާ ވިދާޅުވީ، ރާއްޖޭގެ ރައްޔިތުންނާއި ބައްދަލުކުރެއްވުމަށް އަތޮޅުތަކަށް ކުރައްވާ ދަތުރުފުޅުވެސް ވަރަށް އަވަހަށް ފައްޓަވާނެ ކަމަށެވެ. އަދި ދިވެހި ކޮންމެ ރައްޔިތަކަށް އެމަނިކުފާނާއި ސުވާލުކުރެވޭގޮތަށް އަދި އެ ރައްޔިތެއްގެ އުދާސްތަކާއި، ޚިޔާލުތަކާއި، އުންމީދުތައް ސީދާ ރައީސަށް ހުށަހެޅޭގޮތަށް، ރައީސް އޮފީހުގެ ވެބްސައިޓުގައި ޕޯޓަލެއް ޤާއިމްކުރައްވާނެ ކަމަށާއި، އެ ޕޯޓަލް ތައްޔާރުކުރުމުގެ މަސައްކަތް މިހާރު ދަނީ ކުރެވެމުން ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ، އެމަނިކުފާނު ދެފުށްފެންނަ ސަރުކާރެއް ބޭނުންވަނީ އޭގެ ޙަޤީޤީ މާނައިގައި ކަމަށެވެ. އަދި ރައްޔިތުންގެ ސުވާލުތަކަށް ޖަވާބު ދެއްވުމަށް ބާއްވާ ޕަބްލިކް ފޯރަމްތައް ސަރުކާރުގެ ފުރަތަމަ 14 ހަފްތާގެ ތެރޭގައި ފައްޓަވާނެ ކަމަށާއި، މިގޮތުން ފުރަތަމަ ފޯރަމް އަންނަ ފެބުރުއަރީ މަހުގެ ތެރޭގައި ބާއްވާނެކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ، ރައްޔިތުންގެ ސުވާލުތަކަށް ޖަވާބު ދެއްވުމަށް ބާއްވާ ޕަބްލިކް ފޯރަމްތަކަކީ، ކޮންމެ ތިންމަހުން އެއްމަހު ބާއްވާނެ ފޯރަމްތަކެއް ކަމަށެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރަށް އެއްމަސް ފުރުނު އިރު، އެމަނިކުފާނު ވެރިކަމަށް ގެނައުމުގައި ބޮޑު ޙިއްޞާއެއްވި، ރައީސް ޔާމީނުގެ ސަޕޯޓަރުން ވަނީ، ރައީސް ޔާމީނާއި މެދު މިސަރުކާރުން އަމަލުކުރާ ގޮތްތަކާއި މެދު ނުރުން ފާޅުކުރަމުންނެވެ. އަދި މިސަރުކާރުގެ އިސް ބޭފުޅުން އަތޮޅުތަކުގެ ރަށްރަށަށް ވަޑައިގެންނެވުމުން، ރައީސް ޔާމީނުގެ ސަޕޯޓަރުން ދަނީ ހުސްގޮނޑިއެއް ދައްކައި، އެބޭފުޅުން ކެމްޕޭންތަކުގައި ރައީސް ޔާމީންގެ ހުސްގޮނޑިއެއް ބޭނުން ކުރިކަން ހަނދާންކޮށްދެމުންނެވެ.