ޕާސްޕޯޓު ހެއްދުމަށްފަހުގައި ޕާސްޕޯޓާއި ހަވާލުވުމަށް އިމިގްރޭޝަނަށް އަންނަ ފަރާތަކީ، ޕާސްޕޯޓުގެ ވެރިފަރާތްނަމަ އެފަރާތުގެ އައިޑީކާޑު ނުގެނައި ނަމަވެސް ޕާސްޕޯޓު ދޫކުރާ ގޮތަށް ހަމަޖައްސާފައިވާ ކަމުގައި އިމިގްރޭޝަނުން ބުނެފިއެވެ.

މިގޮތަށް މިކަން ހަމަޖެއްސެވީ ކޮންޓްރޯލަރ އޮފް އިމިގްރޭޝަން މުޙައްމަދު ޝަމްޢާން ވަހީދު އެގޮތަށް ނިންމެވުމުންކަމުގައިވެސް އިމިގްރޭޝަނުން ވަނީ ބުނެފައެވެ. އަދި މިބަދަލަށް މިއަދުން ފެށިގެން ޢަމަލުކުރަން ފަށާފައިވާ ކަމުގައިވެސް އިމިގްރޭޝަނުން ވަނީ ބުނެފައެވެ.

އިމިގްރޭޝަނުން މިގެނައި ބަދަލާއި ގުޅޭ ގޮތުން ނެރެފައިވާ ނޫސްބަޔާނުގައި ބުނެފައި ވަނީ، އިލެކްޓްރޯނިކް ޕާސްޕޯޓާއި ހަވާލުވުމަށް ވެރިފަރާތުން ހާޟިރުވާނަމަ އައިޑީކާޑު ގެނައުން ލާޒިމް ނުވާނެ ކަމަށާއި، އަދި 18 އަހަރު ނުވާ ކުދިންގެ ބެލެނިވެރިންނާއި ކުދިންނާއި އެކު ޕާސްޕޯޓާއި ހަވާލުވާން އަންނައިރު، އެފަރާތްތަކުގެ އައިޑީކާޑުގެ ފޮޓޯއެއް ދެއްކި ނަމަވެސް އައިޑީކާޑު ވެރިފައިކޮށްދޭނެ ކަމަށެވެ. 

މީގެ ކުރިން ޕާސްޕޯޓުގެ ވެރިފަރާތަށްވެސް އިމިގްރޭޝަނުން ޕާސްޕޯޓު ދޫކުރާނީ، އެފަރާތުގެ އައިޑީކާޑު ހުށައެޅުމުން ޕާސްޕޯޓު ބަލައި އައިފަރާތަކީ، ޕާސްޕޯޓުގެ ވެރިފަރާތްކަން ކަށަވަރުކުރުމަށް ފަހުގައެވެ. 

އަލަށް މިގެނައި ބަދަލާއިގުޅޭ ގޮތުން އިމިގްރޭޝަނުން ބުނީ، އެކަމުގެ މަޤުޞަދަކީ، ރައްޔިތުންނަށް ލުއިފަސޭހަ ޚިދުމަތްތަކެއް ފޯރުކޮށްދިނުން ކަމަށެވެ.