މަސްތުވާތަކެއްޗާއި ދެކޮޅަށް މަސައްކަތްކުރާ ޓާސްކްފޯހުން ހިންގި އޮޕަރޭޝަންތަކުގައި، 7 ކިލޯގެ ޑްރަގާއި ހާހަކަށްވުރެ ގިނަ ބަނގުރާފުޅި އަތުލައިގަނެވިފައިވާ ކަމުގައި ފުލުހުންގެ އިދާރާއިން ވިދާޅުވެއްޖެއެވެ.

މިއަދު މެންދުރުފަހު އިސްކަންދަރުކޮށީގައި ބޭއްވި ނޫސްވެރިންގެ ބައްދަލުވުމުގައި، ޗީފް ސްޕްރިޑެންޓް އޮފް ޕޮލިސް އަހުމަދު ޝާކިރު ވިދާޅުވީ، މަސްތުވާތަކެތީގެ މައްސަލައަކީ، ޤައުމީ މައްސަލައެއް ކަމަށް ބަލައި ސަރުކާރުން އުފެއްދި ޓާސްކް ފޯހުން ހިނގި އޮޕަރޭޝަންތަކުގައި 13 މިލިއަން ރުފިޔާގެ މަސްތުވާތަކެތި އަތުލައިގަނެވިފައި ކަމަށެވެ. އޭގެ ތެރޭގައި ހިމެނެނީ، 7 ކިލޯގެ ޑްރަގާއި، 1،063 ބަނގުރާ ފުޅިއާ ދަޅެވެ.

އަދި މަސްތުވާތަކެތީގެ އޮޕަރޭޝަންތަކުގައި ހުޅުމާލޭފަޅުގައި އަޅާފައިވާ ސަފާރީތަކާއި މާފުށީ ކައިރީގައި އަޅާފައިވާ ސަފާރީތައް ހިމެނޭހެން ކޯޓުއަމުރުގެ ދަށުން ޖުމުލަ 39 ސަފާރީއެއް ބަލައި ފާސްކޮށް، އަދި މަސްތުވާތަކެތީގެ ވިޔަފާރިކުރުމުގައި ބޭނުންކުރަމުން ދިޔަކަމަށް ބެލެވުނު ފަސް އުޅަނދެއްވެސް ޓޯކުރެވިފައިވާ ކަމުގައި އޭނާ ވިދާޅުވިއެވެ.

ޓާސްކް ފޯހުން ހިންގި މަސްތުވާތަކެތީގެ އޮޕަރޭޝަންތަކުގައި 34 ދިވެހިންނާއި، ގިނަ އަދަދެއްގެ ބިދޭސީން ވަނީ ހައްޔަރުކޮށްފައެވެ. އަދި މަސްތުގެ ހާލަތުގައި ތިއްބައި ހައްޔަރުކުރި ބިދޭސީންގެ ތެރެއިން 30 މީހަކު ޑީޕޯޓްކުރުމަށް އިމިގްރޭޝަނާއި ހަވާުލުކުރެވިފައިވާ ކަމުގައިވެސް އޭނާ ވިދާޅުވިއެވެ.

ރާއްޖޭގައި މަސްތުވާތަކެތީގެ މައްސަލައަކީ އެންމެ ބޮޑު އެއް އިޖުތިމާޢީ މައްސަލައެވެ.