ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ޖުމްހޫރީ ޕާޓީގެ ލީޑަރު އަދި ރައްޔިތުންގެ މަޖިލީހުގެ މާމިގިލީ ދާއިރާގެ މެންބަރު ޤާސިމް އިބްރާހީމް މިއަދު ބައްދަލުކުރައްވައިފިއެވެ. މި ބައްދަލުކުރެއްވުން އޮތީ މިއަދު މެންދުރު ރައީސުލްޖުމްހޫރިއްޔާގެ އޮފީހުގައެވެ.

ރައީސް ޑރ. މުއިއްޒު މިއަދު ޤާސިމް އިބްރާހީމާއި ބައްދަލުކުރެއްވިކަން ހާމަކުރެއްވުން ފިޔަވައި، އެބައްދަލުވުމާއި ގުޅޭ ގޮތުން ރައީސުލްޖުމްހޫރިއްޔާގެ އޮފީހުން އަދި އިތުރުމައުލޫމާތެއް ހާމައެއް ނުކުރެއެވެ.

ރައީސުލްޖުމްހޫރިއްޔާގެ އޮފީހުގައި، ރައީސް ޑރ. މުހައްމަދު މުޢިއްޒު ޤާސިމާއި ބައްދަލުކުރެއްވި އިރު، އެންމެ ފަހުން ބޭއްވި ރައްޔިތުންގެ މަޖިލީހުގެ ޖަލްސާގައި މަޖިލީހުގެ ޤަވާއިދުގެ 49 ވަނަ މާއްދާއަށް ގެނައި އިސްލާޙް ތަކަކީ ޤާނޫނު އަސާސީއާ ޚިލާފު އިސްލާޙްތަކެއް ކަމަށް ބުނެ މަޖިލީހުގެ ތަޅުމުގައި ޤާސިމް އަޑުގަދަ ކުރެއްވި އެވެ. އެއިސްލާޙްގެ ސަބަބުން މަޖިލީހުގައި ރައީސުލްޖުމްހޫރިއްޔާއާއި އެމަނިކުފާނުގެ ނައިބުގެ އިތުބާރު ނެތްކަމުގެ މައްސަލަ ފާސްކުރުމަށް އެމްޑީޕީއަށް ވޯޓު ހަމަވެއެވެ. 

މީގެ އިތުރުން މަޖިލީހުގައި ދެއްކެވި ވާހަކަފުޅުގައި، ވަޒީރުންނަށް ރުހުންދިނުމުގެ މައްސަލަ އަވަސްކުރުމަށްވެސް ޤާސިމް ގޮވާލެއްވިއެވެ.

މަޖިލީހުގެ ތެރޭގައި މިސަރުކާރަށް އެއްވެސް ބާރެއް ނެތްއިރު، 20 ވަނަ ރައްޔިތުންގެ މަޖިލީހަށް ޕީއެންސީއާ ޖޭޕީން ގުޅިގެން ވާދަކުރުމާއި ގުޅޭ ގޮތުން ދެޕާޓީގެ އިސްވެރިންގެ މެދުގައި މީގެ ކުރިން މަޝްވަރާތަކެއްވެސް ވަނީކޮށްފައެވެ.