އެމްޑަބްލިޔުއެސްސީ ދިވެހި ޕްރިމިއަ ލީގުގެ ފަހު މެޗު 1-0 އިން ކްލަބް އީގަލްސް ބަލިކޮށް، މާޒިޔާ ސްޕޯޓްސް އެންޑް ރިކްރިއޭޝަން ކްލަބުން ޖެހިޖެހިގެން ހަތަރު ވަނަ ފަހަރަށް ލީގު ކާމިޔާބުކޮށްފިއެވެ.

މި މެޗަށް އީގަލްސްއިން ނިކުތީ އެ ކްލަބުގެ ތާރީޙު ފަވާލުމުގެ ނިޔަތުގައެވެ. އެއީ ކްލަބުގެ ހަޔާތުގައި ފުރަތަމަ ފަހަރަށް ލީގު ކާމިޔާބުކޮށްގެނެވެ. ނަމަވެސް ފަހު މެޗުން ލިބުނު ނާކާމިޔާބީއާއެކު، އީގަލްސްއަށް ލީގު ކާމިޔާބު ކުރެވޭނެގޮތެއް ނުވިއެވެ.

ލީގު ނިމުނުއިރު 16 މެޗުން އީގަލްސްއަށް ލިބިފައި އޮތީ 35 ޕޮއިންޓެވެ. އަދި މި އަދަދަށް މެޗު ކުޅެގެން މާޒިޔާ ހޯދީ 40 ޕޮއިންޓެވެ. 

މާޒިޔާއިން އެންމެ ފުރަތަމަ ލީގު ކާމިޔާބުކުރީ 2016 ވަނައަހަރެވެ. އޭގެ ފަހުން އެ ޓީމުން ވަނީ 20/2019، 21/2020 އަދި 2022 ގައި ވެސް ލީގު ކާމިޔާބުކޮށްފައެވެ. 

ދިވެހި ލީގުގައި އާންމުކޮށް ކޮންމެ ޓީމެއް ކޮންމެ ޓީމަކާ ތިން ފަހަރު ކުޅެއެވެ. ނަމަވެސް ލީގުގައި މި ފަހަރު ކުޅުނީ ދެ ބުރެވެ. އެއީ މާލީ ހާލަތު ހުރިގޮތުން ބައެއް ޓީމުތައް ލީގުން ވަކިވުމުންނެވެ.