އެމްޑަބްލިއުއެސްސީ ދިވެހި ޕްރިމިއާ ލީގުގައި މިއަދު ހަވީރު މާޒިޔާ ސްޕޯޓްސް އެންޑް ރެކްރިއޭޝަނާއި ކްލަބް އީގަލްސް ބައްދަލުކުރާ މެޗަކީ މި ސީޒަނުގެ ޗެމްޕިއަނުން ކަނޑައަޅާނެ މެޗެވެ.

ގަލޮޅު ރަސްމީ ދަނޑުގައި މިއަދު ހަވީރު 3:50 ގައި ފެށުމަށް ހަމަޖެހިފައިވާ މެޗަށް މި ދެ ޓީމުން ނިކުންނަ އިރު ލީގުގެ އެއްވަނައިގައި އޮތީ 13 މެޗުން 37 ޕޮއިންޓު ހޯދައިގެން މާޒިޔާއެވެ. ދެވަނައިގައި އޮތީ 13 މެޗުން 35 ޕޮއިންޓު ހޯދާފައިވާ އީގަލްސްއެވެ. އެހެންކަމުން، މިއަދުގެ މެޗަށް ނިކުންނައިރު، އެންމެ ފައިދާ ބޮޑީ މާޒިޔާއަށެވެ. މެޗު އެއްވަރު ކޯށްލައިގެންވެސް އެ ޓީމަށް ލީގު ކާމިޔާބު ކުރެވޭނެއެވެ.

ލީގުގެ ފަހު މެޗަށް އައިއިރު، މި ދެ ޓީމުން އަދި އެއްވެސް މެޗަކުން ބަލިވެފައެއް ނުވެއެވެ. ލީގުގައި މި ދެ ޓީމު ފުރަތަމަ ބައްދަލުކުރިއިރު މެޗު ވަނީ 2-2 އިން އެއްވަރުވެފައެވެ.

އީގަލްސްއިން އަދި ލީގު ކާމިޔާބު ކޮށްފައިނުވާއިރު، މި ފަހަރުގެ ލީގު އެ ޓީމަށް ކާމިޔާބު ކުރެވުން ވާނީ ވަރަށް ތާރީހީ ކަމަކަށެވެ. މިއަދުގެ ނަތީޖާ މާޒިޔާ ކޮޅަށް ނިކުމެއްޖެނަމަ، އެ ޓީމަށް ޖެހިޖެހިގެން ހަތަރު ފަހަރަށް ލީގު ކާމިޔާބު ކުރެވުނީއެވެ.