ބޮޑެތި ބަލިތަކަށް ފަރުވާ ހޯދަމުންދާ ފަރާތްތަކަށް ޚާއްސަ ޙައްޖު ޖާގައަށް އެދި ހުށައެޅުމުގެ ފުރުސަތު ޙައްޖު ކޯޕަރޭޝަނުން އަލުން ހުޅުވާލައިފިއެވެ. ޙައްޖު ކޯޕަރޭޝަނުން ޢާއްމުކުރި ޢިއުލާނެއްގައި ވިދާޅުވީ މިފުރުސަތު އަލުން ހުޅުވާލީ 1445 ވަނަ އަހަރު ރާއްޖެއިން ޙައްޖަށް ގެންދިޔުމަށް ލިބޭ ޙައްޖު ކޯޓާ އެއްކޮށް އެކޯޕަރޭޝަނަށް ދިނުމަށް ސަރުކާރުން ނިންމުމާއި ގުޅިގެންކަމަށެވެ.  މީގެ ކުރިން އަމިއްލަ ބައެއް ކުންފުނިތަކަށް ޙާއްޖު ކޯޓާ ދިންނަމަވެސް، މީގެ ފަހުން ހުރިހާ ކޯޓާއެއް ހައްޖު ކޯޕަރޭޝަނަށް ދޭން ސަރުކާރުން ނިންމި ނިންމުމާއެކު ޙައްޖަށް ގެންދެވޭ ބަލި މީހުންގެ ޢަދަދުވެސް އިތުވާނެކަމަށް އެކުންފުނިން ވަނީ ބުނެފައެވެ.

ޙައްޖު ކޯޕަރޭޝަނުން ބުނީ އެ ކޯޕަރޭޝަނަށް ލިބޭ ޙައްޖު ކޯޓާގެ ތެރެއިން %5 އަކީ ފުރާނައަށް ނުރައްކާވާ ފަދަ ބޮޑެތި ބަލިތައް ތަޙައްމަލުކުރަމުންދާ މީހުންނަށް ޚާއްޞަ ޖާގަކަމަށެވެ. މިގޮތުން ފުރާނައަށް ނުރައްކާވާ ފަދަ ބޮޑެތި ބަލިތައް ތަޙައްމަލުކުރަމުންދާ 50 މީހުންނަށް ޖާގަ ދޭނެކަމަށް އެކުންފުނިން ވަނީ ބުނެފައެވެ.

ޙައްޖު ކޯޕަރޭޝަނުން ބުނީ މިއުސޫލުގެ ދަށުން މިދިޔަ ނޮވެމްބަރު މަހުގެ 9 ވަނަ ދުވަހާއިހަމައަށް ޙައްޖު ކޯޕަރޭޝަންގެ ޙައްޖު ޖާގަ ލިސްޓުގައި ހިމެނިފައިވާ ފަރާތްތަކުގެ ތެރެއިން ބޮޑެތި ބަލިތަކަށް ފަރުވާ ހޯދަމުންދާ ފުރާނައަށް ނުރައްކާވާ ފަދަ ބަލިތައް ތަޙައްމަލުކުރަމުންދާ މީހުން ޚާއްސަ ޖާގައަށް އެދި ހުށައެޅުމަށް ހުޅުވާލާކަމަށެވެ. މިގޮތުން ހުށައެޅުންތައް ބަލައިގަނެވޭނެ އެންމެ ފަހުގެ ތާރީޚަކީ މިމަހުގެ 31 ވަނަ ދުވަހުގެ މެންދުރުފަހު 14:00 އެވެ. އަދި ޚާއްސަ ޖާގައަށް އެދި ނޮވެމްބަރު މަހުގައި އެދުނު ފަރާތްތަކުން އަލުން ފޯމު ހުށައަޅަން ނުޖެހޭނެކަމަށްވެސް އެކޯޕަރޭޝަނުން ބުންޏެވެ.

ޚާއްސަ ޖާގަތަކަށް އެދި ހުށައަޅާއިރު ހުށައަޅަންވާނީ ބޮޑެތި ބަލިތައް ތަޙައްމަލު ކުރަމުންދާ ފަރާތްތަކަށް ޚާއްސަ ޖާގައަށް އެދޭ ފޯމާއެކުއެވެ. މިފޯމް ޙައްޖު ކޯޕަރޭޝަންގެ ވެބްސައިޓުން ލިބޭނެއެވެ. ހަމައެއާއެކު ބަލި މީހާގެ ހެލްތު ސެޓްފިކެޓްތަކާއި ދިވެހި ރައްޔިތެއްކަން އަންގައިދޭ ކާޑުގެ ސާފު ކޮޕީއެއް ހުށައަޅަންޖެހެއެވެ.

ރާއްޖެއިން ޙައްޖަށް ދިޔުމަށް އެދި ޙައްޖު ކޯޕަރޭޝަންގެ ރަޖިސްޓްރީގައި 6000 އަށްވުރެ ގިނަ މީހުން ތިބިއިރު މީގެތެރެއިން 4700 އަށްވުރެ ގިނަ މީހުން ތިބީ ޙައްޖަށް ދިޔުމަށް ފައިސާ ދައްކާފައެވެ.