ބާޒާރުގައި ފިޔާގެ އަގު އިންތިހާއަށް އުފުލިފައިވުމާ ގުޅިގެން، ފިޔާގެ އަގު ކޮންޓްރޯލް ކުރުމުގެ ގޮތުންނާއި ފިޔާ ހުސްނުވެ ރާއްޖެއިން ލިބޭނެކަން ކަށަވަރު ކުރުމުގެ ގޮތުން، ރާއްޖޭގެ ބާޒާރަށް ބޭނުންވާ މިންވަރަށް ފިޔާ އެތެރެކުރަން އިސްޓީއޯއިން ފަށައިފިއެވެ.

އެސްޓީއޯއިން ހާމަކޮށްފައިވާ ގޮތުގައި، އެ ކުންފުނިން ވަނީ މިހާރު 4،500 ބަސްތާގެ ފިޔައި ރާއްޖެ އެތެރެ ކޮށްފައެވެ. އަދި މި ފިޔާ އާންމުންނަށް ލިބޭނީ ވިޔަފާރިތަކުންކަމަށް ވެސް އެ ކުންފުނިން މައުލޫމާތުދެއެވެ.  

އެސްޓީއޯއިން އިތުރަށް ހާމަކޮށްފައިވާ ގޮތުން، އާންމު ވިޔަފާރިތަކަށް ފިޔާ ދޫކުރާނީ އާންމު ރައްޔިތުންނަށް ވިއްކުމަށް ވަކި އަގެއް ކަނޑައެޅުމަށްފަހުއެވެ. އެގޮތުން ރީޓެއިލް ކުރުމަށް އެ ކުންފުނިން ކަނޑައަޅާފައިވާ އެންމެ ބޮޑު އަގަކީ 20ރ. އެވެ.

އެސްޓީއޯގެ ތަފާސް ހިސާބުތައް ދައްކާ ގޮތުން، އިންޑިއާ ބާޒާރުގައި ފިޔާގެ އަގު އޯގަސްޓް މަހު އުފުލެން ފެށުމާ ގުޅިގެން، އޮކްޓޯބަރ މަހާ ހަމައަށް އައިއިރު ރާއްޖޭގެ ބާޒާރުގައި ފިޔާ ބައްތާއެއްގެ އަގު އުޅުނީ 400ރ. އަށެވެ. މި އަގު އުފުލެމުން ގޮސް، ޑިސެމްބަރު މަހާ ހަމައަށް އައިއިރު ބާޒާރުގައި ފިޔާ ބަސްތާއެއްގެ އަގު ހުރީ 800ރ. އާއި 900ރ. ދެމެދުގެ އަގަކަށެވެ.

ފިޔާގެ އަގު ކޮންޓްރޯލް ކުރުމަށް އެސްޓީއޯއިން އިމްޕޯޓް ކޮށްފައިވާ ފިޔާގެ ފުރަތަމަ ޝިޕްމެންޓް މިހާރުވަނީ ބާޒާރަށް ނެރެފައެވެ. އެ ކުންފުނިން ހާމަކޮށްފައިވާ ގޮތުގައި، އެ ކުންފުނީގެ އަމާޒަކީ އެކަށޭނަ އަގެއްގައި ފިޔާ ރާއްޖެ އެތެރެކުރެވެންދެންނާއި އަދި ބާޒާރުގައި ފިޔާގެ އަގު ކޮންޓޮރޯލް ކުރެވެންދެން ރާއްޖެއަށް ބޭނުންވާ މިންވަރަށް ފިޔާ ސަޕްލައިކޮއްދިނުމެވެ.