ފުޓްބޯޅަ އެސޯސިއޭޝަން އޮފް ދަ މޯލްޑިވްސްގެ ރައީސަކު ހޮވުމަށް މި އަންނަ ޖެނުއަރީ މަހުގެ 31 ގައި ބޭއްވުމަށް ހަމަޖެހިފައިވާ އިންތިހާބުގައި މިހާރުގެ ރައީސް، ބައްސާމް އަދީލް ޖަލީލް ވާދަނުކުރުމަށް ނިންމައިފިއެވެ. 

ބެލެވޭ ގޮތުގައި އައު ދައުރަކަށް ކުރިމަތި ނުލުމަށް ބައްސާމް މި ނިންމެވީ އޭނާއަށް މިހާރު ކުރިމަތިވެފައިވާ ޕްރެޝަރުތަކާ ގުޅިގެންނެވެ. އެފްއޭއެމްގެ މަސައްކަތްތަކަށް ފީފާއިންނާއި ބޭރުގެ ކަމާގުޅޭ އިދާރާތަކުން ދީފައިވާ ފައިސާއަށް އިހުމާލުވެފައިވާކަމުގެ ތުހުމަތުގައި އޭނާގެ މައްޗަށް މިހާރު އަންނަނީ ޖިނާއީ ދައުވާވެސް ކުރަމުންނެވެ. 

އެފްއޭއެމް މުވައްޒަފުންނަށް މުސާރަ ނުދޭތާ އެތައް މަހެއް ވެފައިވާއިރު، މުސާރަ ނުލިބޭތީ މުވައްޒަފުން މަސައްކަތަށް ނުނިކުންނަން ހަޅުތާލެއްގައި ތިބުމުން، އެސޯސިއޭޝަން ހިންގުން ވަނީ ގާތްގަނޑަކަށް ހުއްޓުމަކަށް އައިސްފައެވެ. އަދި ފީފާ އިން ވަނީ ދާދި ފަހުން، އެފްއޭއެމްގެ މުވައްޒަފުންނަށް މުސާރަ ދޭން ޝަރުތުކޮށް ތިން ލައްކަ ޑޮލަރު ހަމަޖައްސާފައެވެ. އޭގެ ތެރެއިން އެއް ލައްކަ ޑޮލަރު ވަނީ އެފްއޭއެމްއަށް ފޮނުވާފައެވެ.

އެފްއޭއެމްއާ ދެކޮޅަށް ކުރެވޭ ތުހުމަތުތަކާ ގުޅިގެން ޕްރޮސިކިއުޓާ ޖެނަރަލްގެ އޮފީހުގެ އެންގެމަށް ފުލުހުން ކުރިއަށްގެންދާ ތަހުގީގުގައި، މިދިޔަ އޮކްޓޯބަރު 22 ގައި  އެފްއޭއެމްގެ އިދާރާ ރެއިޑް ވެސް ކޮށްފައިވެއެވެ.

މި މައްސަލައާ ގުޅިގެން ޕްރޮސެކިއުޓަރ ޖެނެރަލް ހުސައިން ޝަމީމް ވިދާޅުވީ، އެފްއޭއެމްގެ ފައިސާ ނަހަމަގޮތުގައި ބޭނުންކޮށްފައިވާ މައްސަލައިގައި އެންމެ ބޮޑަށް ތުހުމަތު ކުރެވެނީ އެ އެސޯސިއޭޝަންގެ ރައީސް ބައްސާމަށެވެ.