ރަމަޟާންމަހުގެ ފަހު 10 ގެ ދުވަސްތަކަކީ، ސަރުކާރު ބަންދު ދުވަސްތަކެއްކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިއަދު ކަނޑައަޅުއްވައިފިއެވެ.

ރައީސުލްޖުމްހޫރިއްޔާގެ އޮފީހުން ހާމަކުރައްވާފައިވާ ގޮތުގައި، އަންނަ ރަމަޟާން މަހުންފެށިގެން، ރަމަޟާންމަހުގެ ފަހު 10 ދުވަހަކީ، ސަރުކާރު ބަންދު ދުވަސްތަކެއް ކަމުގައި ހަމަޖެއްސެވީ، މިއަދު ބޭއްވެވި ވަޒީރުންގެ މަޖިލީހުގެ ބައްދަލުވުމުގައި މިނިސްޓްރީ އޮފް އިސްލާމިކް އެފެއާޒް އިން ހުށަހެޅުއްވި ކަރުދާހުގެ މައްޗަށް މަޝްވަރާ ކުރެއްވުމަށް ފަހު. ވަޒީރުންގެ މަޖިލީހުގެ ލަފާފުޅާއި އެކުގައެވެ.

ރަމަޟާންމަހުގެ ފަހު 10 ދުވަސް ރަސްމީ ބަންދު ދުވަސްތަކެއް ކަމުގައި ރައީސުލްޖުމްހޫރިއްޔާ ހަމަޖެއްސެވީ، އިސްލާމީ އުސޫލުތައް ގާއިމުކުރުމާއި، ދީނީ ކަންކަމަށް ރައްޔިތުން ލޯބި ޖެއްސުމާއި، ދީނީ ކަންކަމަށް އިސްކަން ދިނުމަށް ފުރުޞަތު ދިނުމުގެ ގޮތުންކަމުގައި ރައީސުލްޖުމްހޫރިއްޔާގެ އޮފީހުން ވިދާޅުވެއެވެ.

ރިޔާސީ އިންތީޚާބުގެ ކެމްޕޭނުގެ ތެރޭގައި، 30 އޮގަސްޓް 2023ގައި ބ. އޭދަފުށީގައި ބޭއްވި ޖަލްސާގައި ޑރ. މުޢިއްޒު ވަނީ އެމަނިކުފާނުގެ ސަރުކާރެއްގައި ރޯދަމަހުގެ ފަހު 10 ދުވަސް ބަންދު ކުރުމަށް ވަޢުދުވެވަޑައިގެންފައެވެ.

ކަލަންޑަރުގައިވާ ގޮތުން މިއަންނަ ރަމަޟާން މަހުގެ ފަހު ދިހައެއް ފެށޭނީ މާރިޗު 31ވާ އާދިއްތަ ދުވަހުގައެވެ. އެހެންކަމުން މިނިންމެވުމާއި އެކު މާރިޗުމަހުގެ 29 އިން އޭޕްރީލް މަހުގެ 13 ވަނަ ދުވަހާއި ހަމައަށް ހަފްތާ ބަންދާއެކު ސޯޅަދުވަސް ސަރުކާރު ބަންދުވާނެއެވެ.