ށ. މިލަންދޫ މަގުހެދުމުގެ މަސައްކަތް އަވަސްކުރުމާއި ގުޅޭ ގޮތުން އާރްޑީސީގެ އިސްވެރިން މިލަންދޫ ކައުންސިލްގެ މެމްބަރުންނާއި ބައްދަލުކޮށް މަޝްވަރާކޮށްފިއެވެ.

އާރްޑީސީން ހާމަކޮށްފައިވާ ގޮތުގައި، މި ކުންފުނީގެ މެނޭޖިންގ ޑިރެކްޓަރ ބްރިގޭޑިއަރ ޖެނެރަލް (ރޓ) އަލީ ޒުހައިރު އަދި ސީނިއަރ މެނޭޖްމަންޓްގެ އިސްބޭފުޅުން މިއަދު ވަނީ ށ.މިލަންދޫ ކައުންސިލުގެ މެންބަރުންނާއި ބައްދަލުކޮށްފައެވެ. މިބައްދަލުކުރުމުގައި، މަގު ހެދުމުގެ މަޝްރޫޢު ކުރިޔަށް ގެންދިޔުމުގައި ދިމާވާ ގޮންޖެހުންތަކާއި ގުޅޭގޮތުން ވާހަކަ ދެކެވި މަސައްކަތްތައް ހަލުވިކަމާއެކު ކުރިއަށް ގެންގޮސް ނިންމާލުމަށް ކައުންސިލުގެ ފަރާތުން ބޭނުންވާ އެހީތެރިކަން ދިނުމާއި ގުޅޭ ގޮތުން މަޝްވަރާކޮށްފައިވާ ކަމުގައި އާރްޑީސީން ވަނީ ބުނެފައެވެ.

އަދި މީގެ އިތުރުން، އާރްޑީސީގެ ޓީމުން ވަނީ ށ. މިލަންދޫގައި ކުރިއަށްދާ މަގު ހެދުމުގެ މަޝްރޫގެ މަސައްކަތްތައް ހިނގާ ސަރަހައްދުތަކަށް ޒިޔާރަތްކޮށް، މަސައްކަތް ކުރިއަށްދާ ގޮތް ބަލާފައިކަމުގައިވެސް އެކުންފުނިން ބުނެފައިވެއެވެ. އަދި މިލަންދޫގައި ހުންނަ އާރްޑީސީގެ ސައިޓަށް ޒިޔާރަތްކޮށް އާރުޑީސީގެ މުވައްޒަފުންނާއި ބައްދަލުކޮށް މަޝްރޫޢާ ގުޅޭ ކަންކަމުގައި މަޝްވަރާކޮށްފައިވާ ކަމުގައިވެސް އާރްޑީސީން ވަނީ ބުނެފައެވެ.

މިލަންދޫގެ މަގުތައް ތާރުއަޅައިގެން ޒަމާނީ ފެންވަރަށް ތަރައްޤީކުރުމުގެ މަސައްކަތް ސަރުކާރުން އާރް.ޑީ.ސީއާއި ހަވާލުކުރީ 12 މާރިޗު 2021ގައެވެ. މަޝްރޫޢުގެ ޢަމަލީ މަސައްކަތް އެކުންފުނިން ފެށީ އެއަހަރުގެ އޮގަސްޓްމަހުގެ 13 ވަނަ ދުވަހުގައެވެ.

އެ މަޝްރޫޢުގެ ދަށުން މިލަންދޫގައި ޖުމްލަ 6.15 ކިލޯ މީޓަރުގެ މަގު ހެދުމުގެ މަސައްކަތް ކުރުމަށް އާރްޑީސީއަށް ހަވާލުކުރީ 520 ދުވަހުގެ ތެރޭގައި މަސައްކަތް ނިންމާގޮތަށެވެ. އެހެން ނަމަވެސް އެމަސައްކަތް ނިމިފައި ނުވާތީ ސަރުކާރުން އަލުން މުއްދަތު އިތުރުކޮށްދިނެވެ.