މާބަނޑުއިރު ޑައުންސިންޑްރޯމް ހުރި ކުއްޖެއްތޯ ބަލަން ހަދާ ޓެސްޓު އައިޖީއެމްއެޗްގައި ފަށައިފިއެވެ.

ޑައުންސިންޑްރޯމް ކުއްޖެއްތޯ ބަލަން ހަދާ ޓެސްޓު އައިޖީއެމްއެޗު މެދުވެރިކޮށް މީގެ ކުރިން ވެސް ހެދިއެވެ. ނަމަވެސް އޭރު އެ ޓެސްޓު ހެދީ ރާއްޖެއިން ބޭރަށް ސާމްޕަލް ފޮނުވައިގެންނެވެ. އެހެންކަމުން ނަތީޖާ ލިބެނީ 2-3 ހަފުތާ ފަހުންނެވެ.

އައިޖީއެމްއެޗްއިން ވިދާޅުވީ، "ވޯލްޑިވްސް" ނަމަކަށް ކިޔާ ކުންފުންޏާ ހަވާލުކޮށްގެން ގެނައި މެޝިނުން ޑައުންސިންޑްރަމްގެ އިތުރުން ޕަޓައު ސިންޑްރޯމް، ޓްރައިޕްލޮއިޑީ އަދި ޓާނާ ސިންޑްރޯމް ހުރިތޯ ޓެސްޓު ހެދޭކަމަށެވެ.

އައިޖީއެމްއެޗްގައި މި ޓެސްޓު ހަދަން ފަށާފައިވަނީ މީގެ 2 ހަފްތާ ކުރިންނެވެ. އެ ހޮސްޕިޓަލުން ބުނީ މި ޓެސްޓުތައް ހަދައިދޭނީ ޑޮކްޓަރުގެ ލިޔުމާއެކުގައެވެ.