ޝަރުޢީ ދާއިރާއަށް ނުފޫޒު ނުފޯރުވުމަށް ވީ ވަޢުދަށް ވަފާތެރިވަމުން އަންނަ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، އިއްޔެ ފާހަގަކުރި ދިވެހިރާއްޖޭގެ ހުރަވީ ދުވަހުގެ މުނާޞަބަތުގައި ދެއްކެވި ވާހަކަފުޅުގައެވެ.

ރައީސުލްޖުމްހޫރިއްޔާ ވިދާޅުވީ، ޝަރުޢީ ދާއިރާއަށް ނުފޫޒު ފޯރުވުން މުޅިން ހުއްޓާލުމަށް އެމަނިކުފާނުގެ ސަރުކާރުން ވީ ވަޢުދަށް ވެސް ފުރަތަމަ ދުވަހުން ފެށިގެން އަންނަނީ ވަފާތެރިވަމުންކަމަށެވެ. ޝަރުޢީ ދާއިރާއާއި ގުޅޭ ގޮތުން އެމަނިކުފާނު މިމޭރުމުން ވާހަކަފުޅު ދެއްކެވި އިރު، އެމަނިކުފާނުގެ ސަރުކާރަށް މިވީ އެއްމަސްދުވަހުގެ ތެރޭގައި، ޝަރުޢީދާއިރާ އިސްލާޙް ކުރުމާއި ގުޅޭ ގޮތުން އަދި ސިޔާސީ ނުފޫޒުން ޝަރުޢީދާއިރާ މިނިވަން ކުރުމާއި ގުޅޭ ގޮތުން ކުރެއްވި އެއްވެސް މަސައްކަތެއް ހާމަކުރައްވާފައެއް ނުވެއެވެ.

ޝަރުޢީދާއިރާއަށް ސިޔާސީ ނުފޫޒު ފޯރާކަމަށް ރައްޔިތުންނާއި ސިޔާސީ ފަރާތްތަކުން ކުރާ އެންމެ ބޮޑު ތުޙުމަތަކީ ފަނޑިޔާރުންގެ ކަންކަން ބަލަން އޮތް ޖުޑީޝަލް ސަރވިސް ކޮމިޝަންގައި ސިޔާސީ ބޭފުޅުން ތިއްބެވުމެވެ. މިގޮތުން ރައީސުލްޖުމްހޫރިއްޔާގެ ފަރާތްޕުޅުން ޖޭއެސްސީއަށް ޢައްޔަނުކުރައްވާ މެމްބަރު، ރައީސް ޑރ. މުޙައްމަދު މުޢިއްޒުވެސް ވެރިކަަމަށް ވަޑައިގެންނެވި ގޮތަށް ވަނީ ބަދަލު ކުރައްވާފައެވެ. 

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ އެންމެ މުހިއްމު ވަޢުދަކީ، ރައީސް ޔާމީނު ވެރިކަމުގެ ފުރަތަމަ ދުވަހުގައި މިިނިވަން ކުރެއްވުމެވެ. އެހެން ނަމަވެސް މިހާތަނަށްވެސް ރައީސް ޔާމީން މިނިވަން ކުރުމާއި ގުޅޭ ގޮތުން ސަރުކާރުން ކުރި މަސައްކަތެއް ހާމަކޮށްފައި ނުވާއިރު، ރައީސް ޔާމީނަށް ކުރީ ސަރުކާރުން ދެއްވި ލުޔެއް މެނުވީ އިތުރު ލުޔެއް ލިބިފައި ނުވާކަމުގައި އެމަނިކުފާނު ވަނީ ވިދާޅުވެފައެވެ.