އިންގްލިޗް ޕްރިމިއަރ ލީގުގައި ހޮނިހިރު ދުވަހުގެރޭ އޭއެފްސީ ބޯންމައުތު އާއި ލުޓޯން ޓައުން އެފްސީ ބައްދަލު ކުރި މެޗުގައި، ލުޓޯންގެ ކެޕްޓަން ޓޮމް ލޮކިޔަރ ހުއްޓިގެން ދަނޑުމައްޗަށް ވެއްޓިއްޖެއެވެ. އޭނާ ވެއްޓުމާއެކު މެޑިކަލް ޓީމުން ވަނީ ވަގުތުން ފަރުވާދޭންފަށާފައެވެ.

މެޑިކަލް ޓީމުން ފަހުން ހާމަކުރި ގޮތުގައި އޭނާ ވެއްޓުނީ ހާޓްއެޓޭކެއް ޖެހިގެންނެވެ. ނަމަވެސް މިހާރު އޭނާގެ ހާލަތު ރަގަޅުވަމުން އަންނަކަމަށް ވެސް މެޑިކަލް ޓީމުން މައުލުމާތުދެއެވެ. 

ދެވަނަ ހާފުގެ 14 ވަނަ މިނެޓުގައި ލޮކިޔަރ ވެއްޓުނީ ދަނޑުގެ ސެންޓަރ ސާރކަލް އާ ހިސާބަށެވެ. އޭނާއަށް އިތުރަށް ފަރުވާ ދިނުމަށް ސްޓްރެޗަރގައި ދަނޑުން ބޭލުމަށްފަހު، ދެ ޓީމުގެ ކުޅުންތެރިން ވެސް ވަނީ ދަނޑުން ބާލާފައެވެ. އަދި އެއަށްފަހުން ރެފްރީ ސިމޮން ހޫޕަރ ނިންމީ އެ ވަގުތުން ފެށިގެން މެޗުގެ ކުޅުން ސަސްޕެންޑް ކުރުމަށެވެ. 

މެޗުގެ ކުޅުން ހުއްޓުނު އިރު، ދެ ޓީމު ވެސް އޮތީ ގޯލެއް ކާމިޔާބު ކޮށްފައެވެ. ލުޓޯންގެ އެލިޖާ އަޑެބަޔޯ ގޯލެއް ޖަހާފައިވަނިކޮށް، ބޯންމައުތަށް މެޗު ހަމަހަމަ ކޮށްދިނީ ޑޮމިނިކް ސޮލަންކީއެވެ. 

ހަބަރުތައް ބުނާ ގޮތުން، މިއީ ލޮކްޔަރއަށް ހާޓްއެޓޭކެއް ޖެހުނު ދެވަނަ ފަހަރެވެ. އެންމެ ފުރަތަމަ ފަހަރު އޭނާއަށް ހާޓްއެޓޭކެއް ޖެހިފައިވަނީ މިދިޔަ ސީޒަންގެ ޕްލޭ އޮފް މެޗެއްގައެވެ. އަދި ހިތުގެ އޮޕަރޭޝަނެއް ކޮށްފައި، އޭނާއަށް ކުޅެވޭނެކަމަށް ޑޮކްޓަރުން ބުނުމުން، ލޮކިޔަރ އަނބުރާ ދަނޑަށް ނިކުމެފައިވަނީ މިދިޔަ ޖޫންމަހުގެ ތެރޭގައެވެ.