ރައީސުލްޖުމްހޫރިއްޔާ ފަސޭހައިން މަޤާމުން އަޒުލްކުރެވޭ ގޮތަށް މަޖިލީހުގެ ޤަވާއިދަށް ގެންނަން އުޅޭ އިސްލާހަށް ރައިސް ޑރ. މުއިއްޒު ނުސީދާ ރައްދެއް ދެއްވައިފިއެވެ.

އެމަނިކުފާނު މިމޭރުމުން ވާހަކަފުޅު ދައްކަވާފައި ވަނީ މިރޭ ސޯޝަލް ސެންޓަރުގައި ބޭއްވެވި ހުރަވީ ދުވަހުގެ ރަސްމީ ޖަލްސާގައެވެ.

އިދިކޮޅު ފަރާތްތަކުން، ރައްޔިތުންގެ މަޖިލީހުގެ ޤަވާއިދަށް ބަދަލު ގެނެސް، ރައީސުލްޖުމްހޫރިއްޔާ އާއި އެމަނިކުފާނުގެ ނާއިބު މަޤާމުން ވަކިކުރުވުމުގެ އިޖުރާއަތްތައް އަވަސްކޮށް ފަސޭހަ ކުރުމަށް މަސައްކަތް ކުރަމުންދާ މިދަނޑިވަޅުގައި، އެކަމަށް ރައްދު ދެއްވާ މޭރުމަކުން، ރައީސުލްޖުމްހޫރިއްޔާ ވަނީ ވާހަކަފުޅު ދައްކަވާފައެވެ.

ހުރަވީ ދުވަހާއި ގުޅޭ ހާދިސާތަކުގެ މައްޗަށް އަލިއަޅުއްވާލައްވަމުން ރައީސް ޑރ. މުޙައްމަދު މުޢިއްޒު ވިދާޅުވީ، ވެރިކަމުގެ ދަހިވެތިކަމުގައި ހޮޅިންނާއި ބައިވެރިވެ ދިވެހި ޤައުމަށް ޚިޔާނާތްތެރިވި، ޝަމްސުއްދީނާއި މުޙްޔިއްދީނު ކަނޑުފައްތައި މަރާލުމަކީ، ދިވެހިރާއްޖެ ދެމި އޮތްހައި ދުވަހަކު ހަމަ ކޮންމެ ދިވެހި ދަރިޔަކު ފިލާވަޅު ލިބިގަންނަންޖެހޭ ކަމެއް ކަމަށެވެ.

ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ވެރިކަމަށް ވަޑައިގެންނެވީ، އެތައް ދޮގުތަކެއް ހައްދަަވައިގެން ކަމުގައި، ތުހުމަތު ކޮށްފައި ވާއިރު، ރައީސުލްޖުމްހޫރިއްޔާގެ ވާހަކަފުޅުގައި ވަޢުދާ ޚިލާފުވުމާއި މުނާފިޤުންގެ ސިފަތަކުގެ މައްޗަށްވެސް އަލިއަޅުއްވައި ލެއްވިއެވެ. އަދި ދިވެހިރައްޔިތުންނަށް އެމަނިކުފާނު އަރުވާ ޔަޤީންކަމަކީ އެމަނިކުފާނު ވެވަޑައިގެންނެވި ވަޢުދުތަކަށް އަމާނާތްތެރިވާނެ ކަމުގެ ޔަޤީންކަން ކަމުގައިވެސް ރައީސް ޑރ. މުޙައްމަދު މުޢިއްޒު ވިދާޅުވިއެވެ.

ރައީސްކަމުގެ މަޤާމަށް ވަޑައިގެންނެވުމަށް ކުރެއްވި ކެމްޕޭނުގެ ތެރޭގައި ވެވަޑައިގެންނެވި މައިގަނޑު އެއް ވަޢުދުގެ މައްޗަށް އަލިއަޅުއްވައިލައްވައި، ރައީސުލްޖުމްހޫރިއްޔާ ވިދާޅުވީ، އިންޑިޔާ ސިފައިން ރާއްޖެއިން އަނބުރާ ގެންދިޔުމަށް، ވެރިކަމުގެ ފުރަތަމަ ދުވަހު ދިވެހި ސަރުކާރުން އިންޑިއާއަށް އެންގިކަމަށެވެ. އަދި އެކަމާ ބެހޭ އިންތިޒާމުތަކާ ބެހޭ ގޮތުން މަތީފެންވަރުގައި ދެ ދައުލަތުގެ ދެމެދުގައި މަޝްވަރާތައް ކުރިޔަށް އެބަދާކަމަށާއި، އިންޑިޔާ ސަރުކާރުން ދޭ ޔަޤީންކަމަކީ އިންޑިޔާ ސިފައިން އަނބުރާ ރާއްޖެއިން ގެންދާނެކަން ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.

މީގެ އިތުރުން، އެމަނިކުފާނު ދިވެހި ރައްޔިތުންނަށް އަރުވާ ކަށަވަރުކަމަކީ ބޭރުގެ އެއްވެސް ދައުލަތެއްގެ ސިފައިން ގާއިމުވެ ނުތިބޭ ބިމަކަށް މި ލޮބުވެތި ދިވެހި ބިން ހެއްދެވުން ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.