މިއަދު ބޭއްވި، ބައި އިލެކްޝަންތަކުގައި، ކެލާ ކައުންސިލާއި މާފަރު ކައުންސިލްގެ ގޮނޑި އާއި މާފަރު އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ގޮނޑި ޕީޕީއެމްއިން ކާމިޔާބުކޮށްފިއެވެ.

މިއަދު ކުރިޔަށް ދިޔަ މިއިންތިޚާބުތަކުގެ ވަގުތީ ނަތީޖާ އިލެކްޝަންސް ކޮމިޝަނުން މިހާރު ވަނީ އާއްމުކޮށްފައެވެ.

ވަގުތީ ނަތީޖާއިން ދައްކާ ގޮތުން، ކެލާ ކައުންސިލްގައި އަންހެނުންނަށް ޚާއްޞަކޮށްފައިވާ ގޮނޑީގެ ބައި އިލެކްޝަންގައި ވާދަކުރި ޕީޕީއެމް ކެންޑިޑޭޓް ޚަދީޖާ މައުރިފާ އެގޮނޑި ކާމިޔާބު ކުރެއްވީ، 402 ވޯޓު ހޯދައިގެންނެވެ. އޭނާއާ ވާދަކުރި، އެމްޑީޕީގެ ކެންޑިޑޭޓް ހައްވާ ސުދާއަށް ލިބުނީ، 367 ވޯޓެވެ. މީގެ އިތުރުން ނ. މާފަރު ކައުންސިލުން ހުސްވެފައިވާ ގޮނޑިއަށް މެމްބަރަކު އިންތިޚާބުކުރުމަށް ބޭއްވި ބައި އިލެކްޝަންގައި އެގޮނޑި ކާމިޔާބުކޮށްފައި ވަނީ، ޕީޕީއެމްގެ ކެންޑީޑޭޓް މުހައްމަދު އަބޫބަކުރެވެ. އޭނާއަށް 239 ވޯޓު ލިބުނު އިރު އޭނާއާ ވާދަކުރި އެމްޑީއޭގެ ކެންޑިޑޭޓް މުސްލިމް މުހައްމަދަށް ލިބުނީ، 90 ވޯޓެވެ. މީގެ އިތުރުން ނ. މާފަރު އަންހެނުންގެ ތަރައްޤީއަށް މަސައްކަތް ކުރާ ކޮމިޓީއަށް މެމްބަރަކު އިންތިޚާބުކުރުމަށް ބޭއްވި ބައި އިލެކްޝަން 217 ވޯޓާއިއެކު ކާމިޔާބުކޮށް އެގޮނޑި ކަށަވަރުކޮށްފައި ވަނީ ޕީޕިއެމްގެ ކެންޑިޑޭޓް މަރިޔަމް ޝާއިރާއެވެ. އޭނާ އާ ވާދަކުރި އެމްޑީޕީގެ ކެންޑިޑޭޓް އަސްރާރު ހަސަންއަށް ލިބުނީ 113 ވޯޓެވެ.

މީގެ އިތުރުން މިއަދު ބޭއްވި، އދ. ހަންޏާމީދޫ ކައުންސިލްގެ ބައި އިލެކްޝަންގައި، އެގޮނޑި ކާމިޔާބުކޮށްފައި ވަނީ، އަމިއްލަ ގޮތުން ވާދަކުރެއްވި ކެންޑިޑޭޓް މުޙައްމަދު ޔާސިރެވެ. އޭނާ އާ ވާދަކުރި ޕީޕީއެމްގެ ކެންޑިޑޭޓް މުޙައްމަދު ވަޙީދަށް ލިބުނީ 169 ވޯޓެވެ.