ޢަރަބި ދުނިޔޭގެ މުއްސަނދި ޤައުމެއް ކަމުގައިވާ، ކުވައިތުގެ އަމީރު ޝެއިޚް ނަވާފް އަލް އަޙްމަދު އަލްޞަބާޙް އުމުރުފުޅުން 86 އަހަރުގައި މިއަދު އަވަހާރަވެއްޖެއެވެ.

ކުވައިތުގެ ދައުލަތުގެ މީޑިއާއިން ހާމަކޮށްފައިވާ ގޮތުގައި، އަމީރުގެ ޙާލުކޮޅު ގޯސްވެގެން ހޮސްޕިޓަލުގައި އެޑްމިޓްކުކުރީ ނޮވެމްބަރު މަހުގެ ފަހުކޮޅުގައެވެ. އެހެން ނަމަވެސް އޭރު އެމަނިކުފާނު ފަރުވާ ހޯއްދަަވަމުން ގެންދެވީ ކޮންކަމަކާއި ގުޅިގެން ކަމެއް ކުވައިތު ސަރުކާރުން ހާމައެއް ނުކުރެއެވެ. މީގެ ކުރިން 2021 ވަނަ އަހަރު މާރިޗު މަހުވެސް ކުވެއިތުގެ އަމީރު ވަނީ، އެމެރިކާގައި ފަރުވާ ހޯއްދަވާފައެވެ.

ޝައިޚް ނަވާފް ކުވައިތުގެ އަމީރުކަމުގެ ހުވާ ކުރެއްވީ 2020 ވަނަ އަހަރު އެ މަނިކުފާނުގެ ކުރިން އަމީރަކަށް ހުންނެވި، ޝައިޚް ސަބާޙް އަލް އަޙްމަދު އަލް ސަބާޙް އަވަހާރަވުމާ ގުޅިގެންނެވެ.

Advertisement

އަމީރު ޝެއިޚް ނަވާފް އަލް އަޙްމަދު އަލްޞަބާޙްއަށްފަހުގައި ކުވައިތުގެ އަމީރުކަމާއި ދެން ހަވާލުވެވަޑައިގަންނަވާނީ މިހާރު އުމުރުން 83 އަހަރުފުޅުގެ، ޝައިޚް މިޝައިލް އަލް އަޙްމަދު އަލް ޖަބަރުއެވެ. އެމަނިކުފާނަަކީ މިހާތަނަށް ދުނިޔޭގައި ހުންނެވި އެންމެ އުމުރުފުޅުން ދުވަސްވީ ވަލީ އަޙްދެވެ.

4.2 މިލިއަން މީހުންގެ އާބާދިއެއް އޮންނަ ކުވައިތަކީ، ދުނިޔޭގައި 6 ވަނައަށް އެންމެ ބޮޑު ތެލުގެ ރިޒާވް އޮތް ދުނިޔޭގެ އެންމެ މުއްސަނދި ޤައުމުތަކުގެ ތެރޭގައި ހިމެނޭ ޤައުމެކެވެ.