ޕްރޮގްރެސިވް ކޮންގްރެސް ކޯލިޝަންގެ މަޖިލިސް ޕްރައިމަރީ ފަސްކޮށްފިއެވެ.

ޕްރޮގްރެސިވް ކޮންގްރެސް ކޯލިޝަނުން ބުނީ ޕްރައިމަރީ އަންނަ މަހުގެ 20 ވަނަ ދުވަހަށް ފަސްކޮށްފައިވާކަމަށެވެ. ޕްރޮގްރެސިވް ކޮންގްރެސް ކޯލިޝަންގެ މަޖިލިސް ޕްރައިމަރީ ބޭއްވުމަށް މީގެކުރިން ހަމަޖައްސާފައި އޮތީ މިމަހުގެ 23 ވަނަ ދުވަހުއެވެ.

ކޯލިޝަނުން ނެރުނު ޢިއުލާނެއްގައި ބުނީ، ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި އެކޯލިޝަންގެ ފަރާތުން ވާދަކުރާ ފަރާތްތައް ކަނޑައެޅުމަށް ބާއްވާ ޕްރައިމަރީގެ ތާރީޚު ފަސްކުރުމަށް ނިންމީ ކުރިން ހަމަޖައްސާފައިވާ ތާރީޚަކީ ސްކޫލް ބަންދު ދުވަސްވަރެއްކަމުގައިވެފައި ގިނަ ޢަދަދެއްގެ ރައްޔިތުން އެކި ސަބަބުތަކަށްޓަކައި ޤައުމުން ބޭރަށް ދަތުރުކުރާނެތީކަމަށެވެ. އަދި ޕްރައިމަރީ ބާއްވާ ތާރީޚު ފަސްކޮށްދިނުމަށް ޕްރައިމަރީގައި ވާދަކުރާ ފަރާތްތަކާއި ކޯލިޝަންގެ ޢާއްމު މެމްބަރުންވެސް އެދިފައިވާކަމަށް އިއުލާންގައިވެއެވެ.

އެހެންކަމުން ޕްރައިމަރީގައި ވާދަކުރާ ކެންޑިޑޭޓުންގެ ތެރެއިން ޝަރުޠުހަމަވާ ކެންޑިޑޭޓުންގެ ނަންތައް ކުރިއަށް އޮތް ހަފްތާގެ ތެރޭގައި ޢާއްމުކުރާނެކަމަށާއި އަދި ޕްރައިމަރީގައި ވޯޓު ލެވޭ މީހުންގެ ލިސްޓާއި ވޯޓު ނެގުން ކުރިއަށް ގެންދިޔުމަށް ހަމަޖެހިފައިވާ ވަގުތުވެސް ޢާއްމުކޮށް ޢިއުލާންކުރާނެކަމަށް ބަޔާނުގައިވެއެވެ.

ރައްޔިތުންގެ މަޖިލީހުގެ އިންތިޚާބުގެ ޕްރައިމަރީގައި ބައިވެރިވުމަށް ޕީޕީއެމް އަދި ޕީއެންސީގެ ފަރާތުން 354 ފޯމުވަނީ ހުށައަޅާފައެވެ. އަދި 10 ދާއިރާއަކަށް އެންމެ މީހަކު ކުރިމަތިލާފައިވާތީ އެފަރާތްތަކަށް ޕާޓީގެ ޓިކެޓު ވަނީ ޕްރައިމަރީއަކާއި ނުލައި ލިބިފައެވެ.