ދިވެހި ޕްރިމިއަރ ލީގުގައި މިއަދު ހަވީރު މާޒިޔާ ސްޕޯޓްސް އެންޑް ރެކްރިއޭޝަން ކްލްބާއި ޓީސީ ބައްދަލުކުރި މެޗު ފަސޭހަކަމާއެކު ކާމިޔާބުކޮށް، ލީގު ތައްޓާ ކައިރިއަށް މާޒިޔާއިން ޖެހިލައިފިއެވެ. ގަލޮޅު ދަނޑުގައި ކުޅުނު މި މެޗު މާޒިޔާއިން ކާމިޔާބު ކުރީ 4-0 އިންނެވެ.

ޓީސީއާ ދެކޮޅަށް މާޒިޔާއިން މިހޯދި 3 ޕޮއިންޓާއެކީ އެ ޓީމުން މިވަނީ 13 މެޗުން 37 ޕޮއިންޓު ހޯދާފައެވެ. އެހެންކަމުން މި އަދަދަށް މެޗު ކުޅެ 35 ޕޮއިންޓު ހޯދާފައިވާ އީގަލްސްއަށް ވުރެން ދެ ޕޮއިންޓު އިތުރަށް ހޯދާ، މާޒިޔާއިން މިވަނީ ލީގު ތަށީގައި އެއް އަތުން ހިފަހައްޓާފައެވެ. އަނެއްކޮޅުން ތަށީގައި ހިފަހައްޓައިގެން ތިބި އީގަލްސްއަށް، އެ ޓީމުގެ ތާރީހު ބަދަލުކޮށްލުމަށް ތަށި އުފުލާލެވޭނީ ލީގު ފަހުމެޗުގައި މި ދެ ޓީމު ބައްދަލު ކުރާ މެޗު ކާމިޔާބުކޮށްގެންނެވެ. އެ މެޗު ކުޅެން ހަމަޖެހިފައިވަނީ އަންނަ އަންގާރަ ދުވަހުއެވެ.

ލީގު ޓޭބަލްއަށް ބަލާއިރު، މެޗު އެއްވަރުކޮށްލައިގެންވެސް މާޒިޔާއަށް ފަރު ޖެހޭނެއެވެ. އެހެންވެއްޖެނަމަ އެ ޓީމަށް ޖެހިޖެހިގެން 4 ލީގު ތަށި ކާމިޔާބު ކުރެވުނީއެވެ.

މިއަދުގެ މެޗުގައި މާޒިޔާގެ ގޯލުތައް ކާމިޔާބުކޮށްދިނީ އެ ޓީމުގެ ސާބިއާ ފޯވާޑް، ވޮޖިސްލާވް ބަލަބަނޮވިޗް އާއި އިބްރާހިމް އައިސަމް އަދި ހަމްޒާ މުހައްމަދު (ހަމްޕު) އެވެ. އެ ޓީމުން ވަނީ މެޗުގެ ފުރަތަމަ 25 ވަނަ މިނެޓުގެ ތެރޭގައި 3 ގޯލު ކާމިޔާބުކޮށްފައެވެ. އަދި ފަހު ގޯލު ކާމިޔާބުކޮށްފައިވަނީ މެޗުގެ 76 ވަނަ މިނެޓުގައެވެ. މި މެޗުގައި މާޒިޔާގެ ބަލަބަނޮވިޗް ވަނީ 2 ގޯލު ކާމިޔާބުކޮށްފައެވެ.