މުޖުތަމައުގައި ހިނގާ ނޭންގާނީ ކަންކަން ހުއްޓުވުމަށް ފަރުދީގޮތުންވެސް މަސައްކަތް ކުރުމަށް ހުކުރު ޚުޠުބާގައި ގޮވާލައިފިއެވެ،

މިއަދު މުޅި ރާއްޖޭގައި އިއްވި ހުކުރު ޚުޠުބާގެ މައުޟޫޢުއަކީ، "ހެޔޮކަންތަކަށް އަމުރު ކުރުމާއި މުންކަރާތްތައް ނަހީކުރުން" މިމަޢުޟޫއެވެ.

ހުކުރު ހުޠުބާގައި ބުނެފައި ވަނީ، މުޖުތަމަޢުގައި ހިނގާ ނޭންގާނީ ކަންކަން ހުއްޓުވުމަށް ކުރެވޭ ކޮންމެ މަސައްކަތަކީ، ތިމާގެ އަމިއްލަ މުދަލާއި، އަނބިދަރިންގެ ސަލާމަތަށްޓަކައި ކުރެވޭ މަސައްކަތެއް ކަމަށެވެ. އަދި މުޖުތަމަޢުގައި ހިނގާ އެފަދަ ކަންކަމާއި މެދު އަޅާނުލައި ތިބެއްޖެނަމަ މަންޒިލް މަޤުޞޫދަށް ވާޞިލްވުމުގެ ކުރިން މުޖުތަމަޢު ހަލާކުވެ ނެތި ހިނގައިދާނެ ކަމުގައި ހުކުރު ޚުޠުބާގައި ވަނީ ބުނެފައެެވެ.

މީގެ އިތުރުން، ހެޔޮކަންތަކަށް އަމުރު ކުރުމަށާއި ނުބައިކަންތައް މަނާކޮށް ހުއްޓުވުމަށް މިއަދު ހުކުރު ހުޠުބާގައި ވަނީ އެންމެހާ ފަރާތްތަކަށް ގޮވާލާފައެވެ.