މާލޭ ސިޓީ ކައުންސިލް އިންތިޚާބުގެ ކެންޑިޑޭޓުންގެ ނަން ތަރުތީބު ކުރުން މާދަމާ ބޭއްވުމަށް ހަމަޖައްސާފައިވާ ކަމުގައި އިލެކްޝަންސް ކޮމިޝަނުން ވިދާޅުވެއްޖެއެވެ.

އެކޮމިޝަނުން ހާމަކޮށްފައިވާ ގޮތުގައި ކެންޑިޑޭޓުންގެ ނަން ތަރުތީބު ކުރުމަށްޓަކައި، ގުރުއަތު ނެގުން އޮންނާނީ، މާދަމާ 11 ޖަހާއިރު، އިންތިޚާބާއި ބެހޭ މަރުކަޒު ދަރުބާރުގޭގައި ކަމަށެވެ. އެކޮމިޝަނުން ވިދާޅުވީ ގުރުއަތު ނެގުމަށް ހަމަޖެހިފައިވާ ގަޑިއަށް،  ގުރުއަތުނަގާ ތަނަށް ކެންޑިޑޭޓަކަށް ހާޟިރު ނުވެވޭ ނަމަ ބަދަލުގައި ފޮނުއްވަވާ ބޭފުޅެއް ބަޔާންކޮށް، ކެންޑިޑޭޓުގެ ސިޓީއެއް ކޮމިޝަނަށް ހުށަހަޅަންޖެހޭ ކަމަށެވެ. އަދި ކެނޑިޑޭޓުންވެސް އަދި ކެނޑިޑޭޓުގެ ފަރާތުން ބޭފުޅަކުވެސް ހާޟިރު ނުވާނަމަ ގުރުނަގާނީ އިލެކްޝަންސް ކޮމިޝަނުގެ އޮފިޝަލެއް ކަމުގައި އެކޮމިޝަނުން ވަނީ ވިދާޅުވެފައެވެ.

މާލޭ ސިޓީގެ މޭޔަރުގެ މަޤާމު ހުސްވެ ބައި އިލެކްޝަން ބާއްވަން ޖެހުނީ، މާލޭ ސިޓީގެ މޭޔަރުގެ މަޤާމުގައި ހުންނެވި، ޑރ. މުޙައްމަދު މުޢިއްޒު، ރައީސުލްޖުމްހޫރިއްޔާގެ މަޤާމަށް އިންތިޚާބުވެވަޑައިގެންނެވުންނެވެ. އަދި މާލޭ ސިޓީ ކައުންސިލްގެ 3 ދާއިރާއެއްގެ ގޮނޑި ހުސްވީ ޑރ. މުޢިއްޒުގެ ސަރުކާރުގެ މަޤާމުތަކަށް ވަޑައިގެންނެވުމަށްޓަކައި އެދާއިރާތަކުގެ ގޮނޑިތަކުގައި ތިއްބެވި މެމްބަރުން އިސްތިއުފާ ދެއްވުމުންނެވެ.