ރާއްޖެއިން ނައްތާލެވިފައިވާ ބައްޔެއް ކަމުގައިވާ ފައިލޭރިއާ ޖެހިފައިވާ 17 ބިދޭސީން ހދ ކުޅުދުއްފުށިން ފެނިއްޖެއެވެ.

ހެލްތު މިނިސްޓްރީން ވިދާޅުވީ، ފައިލޭރިއާ ޖެހިފައިވާ މީހުން ފެނިފައި ވަނީ، މިއަހަރުގެ ޑިސެމްބަރު މަހުގެ 1 ވަނަ ދުވަހާއި 2 ވަނަ ދުވަހު، ކުޅުދުއްފުށީގައި ހިންގި ސްކްރީނިންގ ޕްރޮގްރާމްގެ ތެރެއިންނެވެ. މީގެ އިތުރުން އެމިނިސްޓްރީން ވިދާޅުވީ ޓެސްޓްތަކުން ބައްޔަށް ޕޮސިޓިވްވި މީހުންގެ އިތުރު ޓެސްޓްތައް ހެދުމާއި، ފަރުވާ ދިނުމުގެ ކަންކަން އިންތިޒާމް ކުރެވެމުންދާ ކަމަށެވެ. 

ފައިލޭރިއާއަށް ޕޮޒިޓިވްވި މީހުންނަކީ، އެބަލި އުޅޭ ސަރަހައްދުތަކަށް ދަތުރުކޮށް ރާއްޖެއަށް އައިސްފައިވާ ބައެއް ކަމުގައިވެސް ހެލްތު މިނިސްޓްރީން ހަމަކޮށްފައިވެއެވެ. 

ފައިލޭރިއާއަކީ ކިއުލެކްސް ނަމަކަށް ކިޔާ މަދިރިއެއްގެ ޒަރީއާއިން ފެތުރޭ ބައްޔެކެވެ. 

ރާއްޖެއިން އެންމެ ފަހުން ފައިލޭރިއާގެ ބަލި މީހަކު ފެނުނީ 2004 ވަނަ އަހަރުގައެވެ. އަދި 2016 ވަނަ އަހަރު ޑަބްލިޔުއެޗްއޯއިިން ރާއްޖެއަކީ ފައިލޭރިއާ މުޅިން ނައްތާލެވިފައިވާ ޤައުމެއްގެ ގޮތުގައި ކަނޑައަޅާފައިވެއެވެ.