ބޯންމެރޯ ޓްރާންސްޕްލާންޓް ހެދުމަށްޓަކައި މިފެށޭ ހަފްތާގެ ތެރޭގައި އިތުރު ހަތަރުކުއްޖަކު ރާއްޖެއިން ބޭރަށް ފޮނުވާނެ ކަމަށާއި މިއަދު އެއްކުއްޖަކު ފުރާފައިވާ ކަމުގައި މިނިސްޓްރީ އޮފް ހެލްތުން ބުނެފިއެވެ.

އެމިނިސްޓްރީން ބުނީ، ތެލަސީމިއާ  ބައްޔަށް އޮތް ދާއިމީ ހައްލަކީ ބޯންމެރޯ ޓްރާންސްޕްލާންޓޭޝަން ހެދުން ކަމަށްވާއިރު، މި ފަރުވާ ހޯދުމުގައި ދިގު މުއްދަތަކަށް ޚާއްސަ ސަމާލުކަމެއްދީގެން ކުއްޖާ ބަލަހައްޓަންޖެހޭ ކަމަށެވެ.

އެގޮތުން ހޮސްޕިޓަލުން ދެއްވާ އިރުޝާދުތަކަށް އެއްބާރުލުން ދެއްވާ، ބޯންމެރޯ ޓްރާންޕްލާންޓްކޮށް، ރާއްޖެ އައުމަށްފަހުގައިވެސް ޤަވާއިދުން ހަދަންޖެހޭ ޓެސްޓްތައް ހެދުމަށާއި، ޑޮކްޓަރަށް ދެއްކުމަށް މޯލްޑިވިއަން ބްލަޑް ސަރވިސް (އެމް.ބީ.އެސް) އިން އިލްތިމާސްކުރާ ކަމުގައިވެސް އެމިނިސްޓްރީން ވަނީ ބުނެފައެވެ.

ބޯންމެރޯ ޓްރާސްޕްލާންޓް ހެދުމުގެ އިތުރުން ތެލެސީމިއާ ކުދިންނަށް ބޭނުންވާ ފަރުވާ އާއި ބޭސް ވީހާވެސް ލުއި ފަސޭހަ ގޮތެއްގައި ފޯރުކޮށްދިނުމަކީ މިސަރުކާރުގެ އަމާޒެއް ކަމަށާއި، އެގޮތުން  ތެލެސީމިއާ ކުދިންނަށް ފަރުވާދިނުމަށް ޚާއްސަކޮށް ހޮސްޕިޓަލެއް ޤާއިމުކުރުމަށްޓަކައި، އެ ހޮސްޕިޓަލްގެ ޑިޒައިންއާއި އެހެނިހެން އެޑްމިނިސްޓްރޭޓިވްގެ މަސައްކަތްތަކާއި ގުޅޭގޮތުން މަޝްވަރާތައް ވަނީ ފަށާފައި ކަމުގައިވެސް ހެލްތު މިނިސްޓްރީން ވަނީ ބުނެފައެވެ.

އަދި މީގެ އިތުރުން ތެލިސީމިއާ ބައްޔަށް ފަރުވާ ހޯދާ ފަރާތްތަކަށް އާސަންދައިގެ ދަށުން އެސްޓީއޯއިން ހިލޭ ބޭސް ލިބޭނެ އިންތިޒާމް ވެސް ސަރުކާރުން ވަނީ ހަމަޖައްސަވާފައިވާކަމަށާއި، މި އިންތިޒާމްގެ ތެރެއިން މާލެ އާއި އަތޮޅުތެރެއިން ތެލެސީމިއާ ބައްޔަށް ފަރުވާ ހޯދުމުންދާ ފަރާތްތަކަށް ބޭހާއި އެހެނިހެން ކޮންސިއުމަބަލްސް މިހާރު ލިބޭނެ ކަމުގައި އެމިނިސްޓްރީން ވަނީ ބުނެފައެވެ.

ތެލެސީމިއާ ކުދިންނަށް ފަރުވާދިނުމާއި އަދި ތެލެސީމިއާ ކޮންޓްރޯލްކުރުމަށް މަސައްކަތް ކުރުމަކީ މިސަރުކާރުގެ މުހިއްމު ވަޢުދެކެވެ. 

ތެލަސީމިއާ ބަލީގައި 650 ކުދިން މިހާރުވެސް ރާއްޖޭގެ އެކި ސަރަހައްދުތަކުން ފަރުވާ ހޯދަމުންދާކަމުގައި ހެލްތު މިނިސްޓްރީން ހާމަކުރައްވައެވެ.