ރިޔާސީ އިންތިޚާބުގެ ދުވަސްވަރުން ފެށިގެން ކުރީ ސަރުކާރުގެ ދައުރު ނިމުނު ދުވަހާއި ހަމައަށް ކޮށްފައިވާ ހުރިހާ ޕާކިން ޖޫރިމަނާތަކެއް ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު މަޢާފްކޮށްދެއްވައިފިއެވެ. 

ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ރައީސުލްޖުމްހޫރިއްޔާގެ އޮފީހުގެ އަންޑަރ ސެކްރެޓެރީ ފޮރ ޕަބްލިކް ޕޮލިސީ އަލްއުސްތާޛު މުޙައްމަދު ފިރުޒުލް ޢަބްދުﷲ ޚަލީލު ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަޢާފްކޮށްދެއްވާފައި ވަނީ، ސެޕްޓެމްބަރު މަހުގެ 5 އިން ފެށިގެން، ނޮވެމްބަރު މަހުގެ 16 ވަނަ ދުވަހާއި ހަމައަށް ކޮށްފައިވާ ޓްރެފިކް ޖޫރިމަނާތައް ކަމަށެވެ. އަދި މަޢާފްކުރި، ޖޫރިމަނާ ފައިސާގެ އަދަދަކީ، 2.8 މިލިޔަން ރުފިޔާ ކަމުގައިވެސް އޭނާ ވިދާޅުވިއެވެ.

ރިޔާސީ އިންތިޚާބުގެ ކެމްޕޭން ދުވަސްވަރުން ފެށިގެން ކުރީ ސަރުކާރުގެ އެންމެ ފަހު ދެމަސްދުވަހުގައި ކޮށްފައިވާ ޓްރެފިކް ޖޫރިމަނާތައް މަޢާފްކޮށްދެއްވި އިރު، މަޤާމަށް އިންތިޚާބުވެވަޑައިގެންފިނަމަ، ހުރިހާ ޓްރެފިކް ޖޫރިމަނާތަކެއް މަޢާފްކޮށްދެއްވާނެ ކަމުގައި، ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ވަނީ ވިދާޅުވެފައެވެ.

ރިޔާސީއިންތިޚާބުގެ ކެމްޕޭނުގެ ތެރޭގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވަނީ، 17 ނޮވެމްބަރު 2018އިން ފެށިގެން 5 ސެޕްޓެމްބަރު 2023 އާއި ދެމެދުގައި ކޮށްފައިވާ ޓްރެފިކް ޖޫރިމަނާތައް މަޢާފްކޮށްދެއްވާފައެވެ. އެހެންނަމަވެސް އެފަހަރު ޓްރެފިކް ޖޫރިމަނާތައް މަޢާފްކުރައްވާފައި ވަނީ، ޓްރެފިކް ޖޫރިމަނާ މަޢާފްކުރުމުގެ ޕްރޮގްރާމްގައި ބައިވެރިވި ފަރާތްތަކަށެވެ.

2018 ވަނަ އަހަރުގެ ރިޔާސީ އިންތިޚާބުގެ ތެރޭގައި، ރައީސް ޔާމީނުވެސް ވަނީ އެމަނިކުފާނުގެ ރިޔާސީ ދައުރުގެ ތެރޭގައިކޮށްފައިވާ ހުރިހާ ޓްރެފިކް ޖޫރިމަނާތަކެއް މަޢާފްކޮށްދެއްވައި، ސަރުކާރުން  ލައިސަންސް ދިނުމަށް އެއްލަކިންގެ ނަމުގައި ޕްރޮގްރާމެއް ހިންގަވާފައެވެ.