ރައީސް ޑރ. މުހައްމަދު މުއިއްޒު ތުރުކީ އާއި ދުބާއީ އަށް ކުރެއްވި ރަސްމީ ދަތުރުފުޅަށް 3.4 މިލިއަން ރުފިޔާ ހަރަދުވެފައިވާކަމަށް ރައީސް އޮފީހުން ބުނެފިއެވެ.

މިއީ ރައީސް ޑރ. މުއިއްޒު މަގާމާ ހަވާލުވެ ވަޑައިގަތުމަށް ފަހު އެންމެ ފުރަތަމަ ކުރެއްވި ދަތުރުފުޅެވެ. ރައީސްގެ މި ދަތުރުފުޅުގައި ތުރުކީއަށް ވަޑައިގަތުމަށްފަހު ތުރުކީން ވަޑައިގަތީ ދުބާއީއަށެވެ. އެއީ ކޮޕް28 ސަމިޓްގައި ބައިވެރިވެވަޑައިގަތުމަށެވެ. 

ރައީސް އޮފީހުން ހާމަކުރެއްވި ގޮތުން މި ދަތުރުފުޅުތަކަށް ދައުލަތުން ހަރަދުކުރީ 3.4 މިލިއަން ރުފިޔާއެވެ. އޭގެ ތެރެއިން އެންމެ ބޮޑު އަދަދެއް ހަރަދުވީ ޓިކެޓަށެވެ. ޓިކެޓުތަކަށް އެކަނި 2.4 މިލިއަން ރުފިޔާ ހަރަދުވި ކަމަށް ވަނީ ބުނެފައެވެ.

ރައީސް އޮފީހުން ބުނިގޮތުގައި، 28 ބޭފުޅުން ބައިވެރިވެވަޑައިގަތް އެ ދަތުރުފުޅުގައި ތުރުކީ ސަރުކާރުން އެކޮމޮޑޭޝަނާއި ފަރިއްކޮޅުގެ ހަރަދުތައް ހަމަޖައްސައި ދިނަސް، ދުބާއީ ދަތުރުފުޅުގައި ޔުނައިޓެޑް އަރަބް އެމިރޭޓްސް ސަރުކާރުން އެ އިންތިޒާމު ހަމަޖައްސައިދިނީ 10 ބޭފުޅަކަށެވެ. އެހެންކަމުން ދުބާއީ ދަތުރުފުޅުގައި އެކޮމޮޑޭޝަނާއި ފަރިއްކޮޅާއި އެތެރޭގެ ދަތުރުތަކަށް 775،000 ރުފިޔާ ދައުލަތުން ހަރަދުކުރި ކަމަށެވެ. 

ރައީސް ޑރ. މުއިއްޒު ވިދާޅުވެފައިވަނީ ރާއްޖެއިން ބޭރަށް ކުރާ ދަތުރުތަކުގެ ހަރަދު ދަތުރުފުޅު ނިންމަވާތާ 15 ދުވަހުގެ ތެރޭގައި ހާމަކުރައްވާނެކަމަށެވެ.