މިސަރުކާރުގެ އަމާޒަކީ އެއް އަހަރުދުވަހުގެ ތެރޭގައި އައިޖީއެމްއެޗްގައި އައިވީއެފްގެ ޚިދުމަތް ދޭންފެށުންކަމުގައި، ރައީސުލްޖުމްހޫރިއްޔާގެ އޮފީހުގެ އަންޑަރ ސެކްރެޓެރީ ފޮރ ޕަބްލިކް ޕޮލިސީ އަލްއުސްތާޛު މުޙައްމަދު ފިރުޒުލް ޢަބްދުﷲ ޚަލީލު ވިދާޅުވެއްޖެއެވެ.

އޭނާ މިހެން ވިދާޅުވީ، މިސަރުކާރުގެ ހަފްތާ ސާދައިގައި ހިމެނޭ ކަންކަމުގެ މައުލޫމާތު ދެއްވުމަށް، ރައީސުލްޖުމްރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ދެއްކެވި ވާހަކަފުޅުގައެވެ.

ފިރުޒުލް ވިދާޅުވީ، ދަރިމައިވުމާއި ގުޅޭ އެފަދަ ފަރުވާތައް މިވަގުތު ލިބެންހުރީ، ރާއްޖެއިން ބޭރުންނާއި، ރާއްޖޭގެ އަމިއްލަ ހޮޮސްޕިޓަލްތަކުން ކަމަށްވާތީ އެކަމަށް ދައުލަތުން ކުރަންޖެހޭ ހޭދަކުޑަކުރެއްވުމަށާއި ރައްޔިތުންނަށް ލުއިފަސޭހަކޮށްދެއްވުމަށް ސަރުކާރުގެ އަމާޒަކީ އެޚިދުމަތްތައް އެއް އަހަރުގެ ތެރޭގައި ސަރުކާރުގެ މައި ހޮސްޕިޓަލް އައިޖީއެމްއެޗުގައި ޤާއިމްކުރެއްވުން ކަމަށެވެ.

Advertisement

ދަރިމައިވުމާއި ގުޅޭ މައްސަލަތަކަށް ބޭނުންވާ ފަރުވާތައް އާސަންދައިގެ ތެރެއިން ކަވަރުކުރެވޭ ގޮތަށް އުސޫލެއް ހެދުން ހިމަނައި، އާސަންދަ ހިންގުމުގެ ޤަވާއިދަަށް ބަދަލު ގެނެސް ގެޒެޓްކޮށްފައިވާކަންވެސް ފިރުޒުލްވަނީ ފާހަގަކުރައްވާފައެވެ.

ދަރިން ނުލިބޭ މީހުން ދަރިން ހޯދުމަށް ކުރަންޖެހޭ ފަރުވާތަކަކީ މީގެ ކުރިން އާސަންދައެއް ނުލިބެއެވެ. އެހެން ނަމަވެސް އަމިއްލަ ޖަމިއްޔާ ޖަމާއަތްތަކުންނާއި، އަދި ސަރުކާރުގެ އެހެން އިދާރާތަކުގެ އެހީއާއެކު އެފަރުވާ ހޯދޭނެ އިންތިޒާމްތައް ފާއިތުވެ ދިޔަ ތަނުގައި ހަމަޖައްސާފައި އޮތް ނަމަވެސް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދަކީ، އާސަންދައިގެ ތެރެއިން އެކަމުގެ ޚަރަދުތައް ހަމަޖައްސައިދިނުމެވެ.

ދަރިމައިވުމުގެ ފަރުވާތަކަކީ އެކަމަށް ބޮޑު ހޭދައެއް ކުރަންޖެހޭ ފަރުވާތަކެއް ކަމުގައި، އާއްމު އާދައިގެ މީހުންނަށް އެފަދަ ފަރުވާއެއްކޮށް ދަރިން ހޯދުންވެފައި ވަނީ ވަރަށް ބޮޑު ގޮންޖެހުމަށެވެ.