ބިންވެރިޔާ ސްކީމްގެ ދަށުން މާލޭގެ ރަށްވެހިންނަށް ހުޅުމާލޭ ފޭސް 3ން ދޫކޮށްފައިވާ ގޯތިތައް ފުށިދިއްގަރުފަޅަށް ބަދަލުކުރަން އުޅޭކަމަށްބުނެ ދެކެވޭ ވާހަކަތައް އާބަންކޯއިން ދޮގުކޮށްފިއެވެ.

އާބަންކޯގެ މެނޭޖިން ޑައިރެކްޓަރ މުޙައްމަދު ފަޒުލް ރަޝީދު އެކްސްގައި ކުރެއްވި ޕޯސްޓެއްގައި ވަނީ، ބައެއް މީޑިޔާތަކުން ފަތުރާފައިވާ އެޚަބަރު ދޮގުކުރައްވާފައެވެ.

ފަޒުލް ވިދާޅުވީ، އެޗްޑީސީން ހުޅުމާލެ 3 އިން ބިންލިބުނު ފަރާތްތަކުގެ ބިން ފުށި ދިއްގަރުފަޅަށް ބަދަލުކުރުމަށް ނިންމި ވާހަކައަކީ، ޙަޤީޤަތާއި ޚިލާފު ވާހަކައެއް ކަމަށެވެ. 

ފުށިދިއްގަރުފަޅުން ބިންހިއްކައިގެން އެތަނުގައި މީހުން އާބާދުކުރުމަށް، އަންނަ އަހަރަށް ލަފާކުރާ ދައުލަތުގެ ބަޖެޓުގައި މިސަރުކާރުން 400 މިލިޔަން ރުފިޔާ ހިމެނިއެވެ. އެހެން ނަމަވެސް މަޖިލީހުން ބަޖެޓް ފާސްކުރީ އެފައިސާ އުނިކޮށްފައި ކަމަށް ވީނަމަވެސް، ބަޖެޓުގެ ބޭރުންް އެމަޝްރޫޢު ހިންގުމަށް ސަރުކާރުން މަސައްކަތް ކުރަމުންދާކަމުގެ ޚަބަރުތައް ދަނީ ފެތުރެމުންނެވެ.

ގެދޮރުވެރިޔާ ސްކީމްގެ ދަށުން ހުޅުމާލެ ފޭސް 2 އިންނާއި 3ން ވަނީ ގިނަ އަަދަދެއްގެ ބަންޑާރަގޯތި ދިރިއުޅުމަށް ދޫކޮށްފައެވެ.