ފުޓުބޯޅަ އެސޯސިއޭޝަން އޮފް ދަ މޯލްޑިވްސް (އެފްއޭއެމް) ގެ މުވައްޒަފުންނަށް މިހާތަނަށް ނުދީ ހުރި މުސާރަތައް ހަމަޖެއްސުމަށް ފީފާއިން ތިން ލައްކަ ޑޮލަރުގެ ބަޖެޓެއް ކަނޑައަޅާ، އޭގެ ތެރެއިން އެއްލައްކަ ޑޮލަރު އެ އެސޯސިއޭޝަންގެ އެކައުންޓަށް ޖަމާކޮށްފިއެވެ.

އެފްއޭއެމްގެ ވަގުތީ ޖެނެރަލް ސެކްރެޓަރީ، ޖައުޝަން ޝަރީފް ހާމަކުރައްވާފައިވާގޮތުން ފީފާއިން މި ފައިސާ ދިނުމަށް ހަމަޖެހިފައިވަނީ ތިން މަރުހަލާއަކަށް ބަހާލައިގެންނެވެ. އަދި ފުރަތަމަ މަރުހަލާގައި ދިނުމަށް ކަނޑައެޅި 100،000 ޑޮލަރު އެފްއޭއެމްގެ އެކައުންޓަށް މިހާރު ވަނީ ޖަމާކޮށްފައެވެ. އަދި މި ފަންޑުގެ ބާކީ އަދަދު އެފްއޭއެމްއަށް ފޮނުވާނީ، އެއްލައްކަ ޑޮލަރު މުސާރަ ދިނުމަށް ހަރަދު ކުރުމަށްފަހު، މުސާރަ ދިންކަން ކަށަވަރުވާނެ ލިޔެކިޔުންތައް ފީފާއަށް ފޮނުވުމުންކަމަށް މި ނޫހަށް މައުލޫމާތު ލިބެއެވެ.

ފުޓުބޯޅަ އެސޯސިއޭޝަން އޮފް ދަ މޯލްޑިވްސް ބަނގުރޫޓުވެ، މުވައްޒަފުންގެ މުސާރަ ނުދޭތީ ރާއްޖޭގެ ފުޓުބޯޅައިގެ ގިނަ ހަރަކާތްތަކެއް އޮތީ މިހާރު ހުއްޓުމަކަށް އައިސްފައެވެ. އަދި ގިނަ މުވައްޒަފުން މިހާރު އެހެން ވަޒީފާތަކަށް ބަދަލުވެފައިވާކަމުގެ ހަބަރުތައްވެސް ވަނީ ފެންމަތިވެފައެވެ.