އޭއެފްސީ ކަޕްގެ ގްރޫޕް ޑީ ގައި ހޯމަ ދުވަހު މާޒިޔާ ސްޕޯޓްސް އެންޑް ރެކްރިއޭޝަން ކްލަބާއި އިންޑިއާގެ މޯހަން ބަގާން ބައްދަލުކުރި މެޗު 1-0 އިން މާޒިޔާ ކާމިޔާބުކޮށްފިއެވެ.

މޯހަން ބަގާން ކޮޅަށް މާޒިޔާއިން ކާމިޔަބު ކުރި ގޯލު ފެނިގެން ދިޔައީ ފުރަތަމަ ހާފުގައެވެ. ގޯލު ކާމިޔާބުކޮށްދީފައިވަނީ މެޗުގެ 40 ވަނަ މިނެޓްގައި މާޒިޔާގެ ހަސަން ރާއިފް އަހުމަދު (ހަންނަ) އެވެ. މޯހަން ބަގާންގެ ޕެނަލްޓީ އޭރިޔާ ބޭރުން ހަންނަ ފޮނުވާލި ބޯޅަ އަމާޒުވީ ގޯލުގެ މަތީކަނަށެވެ.

މީގެ އިތުރުން ގޯލު ޖަހާނެ ގިނަ ފުރުސަތުތަކަށް މާޒިޔާ ޓީމަށް މުޅި މެޗުގައި ލިބިފައިވެއެވެ. އެގޮތުން އަލީ ފާސިރު (ސެންޓޭ) އާއި އިބްރާހިމް އައިސަމް އާއި ހަމްޒާ މުހައްމަދު (ހަމްޕު) އަދި އެ ޓީމުގެ ސާބިއާ ފޯވާޑް، ވޮޖިސްލާވް ބަލަބަނޮވިޗަށް ލިބުނު ފުރުސަތުތައް ފާހަގަކޮށްލެވެއެވެ.

ގަލޮޅު ދަނޑުގައި ކުޅުނު މި މެޗުގައި މޯހަން ބަގާން ޓީމުން ފެނިގެން ދިޔައީ ވަރަށް އާދައިގެ ކުޅުމެކެވެ. މުބާރާތުގެ ފުރަތަމަ 3 މެޗުން 7 ޕޮއިންޓު ހޯދި ނަމަވެސް، އެއަށްފަހު އެ ޓީމުގެ ކުޅުން ވަރަށް ދަށްވެގެން ދިޔަކަމަށް ފާހަގަ ކުރެވުނެވެ. އަދި މާޒިޔާ މެޗު ކުޅުމަށް އެ ޓީމުގެ ސީނިއާ ގިނަ ކުޅުންތެރިންނާއި ހެޑް ކޯޗު ޖުއާން ފެރާންޑޯ ދަތުރުކޮށްފައެއް ނުވެއެވެ. އެހެންކަމުން މި މެޗުގައި ބޮޑަށް ބޭނުންކޮށްފައިވަނީ ރިޒާވް ޓީމުގެ ކުޅުންތެރިންނެވެ. އަދި ޓީމަށް އިރުޝާދު ދިނީ އިންޑިއާ ގައުމީ ޓީމުގެ ކުރީގެ ކުޅުންތެރިޔާ، ކްލިފޯޑް މިރަންޑާއެވެ.

މި މެޗުން ލިބުނު 3 ޕޮއިންޓާއެކީ މާޒިޔާއަށް ޖުމްލަ ލިބުނީ 6 ޕޮއިންޓެވެ. ނަމަވެސް އެ ޓީމަށް މުބާރާތް ނިންމާލަން ޖެހުނީ ގްރޫޕްގެ އެންމެ ފުލުންނެވެ. މޯހަން ބަގާންއަށް ލިބުނު 7 ޕޮއިންޓާއެކީ އެ ޓީމު މުބާރާތް ނިންމާލީ ގްރޫޕްގެ 3 ވަނައިގައެވެ.