ރިޔާސީ އިންތިޚާބުގައި ވާދަކުރެއްވި, އުމަރު ނަސީރާއި، އިލްޔާސް ލަބީބާއި، ޒަމީލާއި، ފާރިޝް މައުމޫނާއި، ކާނަލް ނާޒިމާއި، އެބޭފުޅުންގެ އިންތިޚާބީ އޭޖެންޓުން ޖޫރިމަނާކޮށް އެފައިސާ އިލެކްޝަންސް ކޮމިޝަނުން އެއްމަސް ދުވަހުގެ ތެރޭގައި ދެއްކުމަށް އަންގައިފިއެވެ.

މިގޮތުން އިލެކްޝަންސް ކޮމިޝަނުން ކޮންމެ ކެންޑިޑޭޓަކު ޖޫރިމަނާކޮށްފައި ވަނީ 20000ރ އިންނެވެ. އަދި އެއިން ކޮންމެ ކެންޑިޑޭޓެއްގެ އިންތިޚާބީ އޭޖެންޓް ޖޫރިމަނާކޮށްފައި ވަނީ 6000ރ އިންނެވެ.

އިިލެކްޝަންސް ކޮމިޝަނުން ހާމަކޮށްފައިވާ ގޮތުގައި، އިންތިޚާބުތަކާއި ބެހޭ ޤާނޫނުގެ 75 ވަނަ މާއްދާގެ (ށ)ގެ ދަށުން ކެންޑިޑޭޓުންނާއި އެ ކެނޑިޑޭޓުންގެ އިންތިޚާބީ އޭޖެންޓުން ޖޫރިމަނާކުރުމަށް މިއަދު ބޭއްވި ކޮމިޝަންގެ ބައްދަލުވުމުގައި ނިންމާފައި ވަނީ އެކެނޑިޑޭޓުންގެ މާލީ ބަޔާންތައް ފުރިހަމަކޮށްފައި ނުވާތީއެވެ.

ރިޔާސީ އިންތިޚާބަށް ކުރިމަތިލި ކެންޑިޑޭޓުންގެ ތެރެއިން މާލީ ބަޔާންތައް ފުރިހަމަ ނުވެގެން ޖޫރިމަނާކުރި ކެންޑިޑޭޓުންނަކީ؛

1- ޢުމަރު ނަސީރު (އަމިއްލަ ގޮތުން)

2- ޙަސަން ޒަމީލް (އަމިއްލަ ގޮތުން)

3- އަހްމަދު ފާރިޝް މައުމޫން ( އަމިއްލަ ގޮތުން)

4- އިލްޔާސް ލަބީބު (ދަ ޑިމޮކްރެޓްސް)

5- މުޙައްމަދު ނާޡިން (އެމްއެންޕީ)

އިލެކްޝަންސްކޮމިޝަނުން ހާމަކުރައްވާފައިވާ ގޮތުގައި، ރިޔާސީ އިންތިޚާބުގައި ވާދަކުރެއްވި އަނެއް ތިން ކެންޑިޑޭޓުންގެ ތެރެއިން، އިންތިޚާބު ކާމިޔާބު ކުރެއްވި، މިހާރުގެ ރައީސުލްޖުމްހޫރިއްޔާ، ޑރ.މުހައްމަދު މުޢިއްޒާއި، އެމްޑީޕީގެ ކެންޑިޑޭޓް އަދި ކުރީގެ ރައީސް އިބްރާހީމް މުޙައްމަދު ޞާލިޙާއި، ޖުމްހޫރީ ޕާޓީގެ ކެންޑިޑޭޓް ޤާސިމް އިބްރާހީމްވެސް ވަނީ ކޮމިޝަނަށް މާލީ ބަޔާންތައް ފުރިހަމަކުރައްވައި ހުށައަޅުއްވާފައެވެ.