ރައްޔިތުންގެ މަޖިލީހުގެ ފޮނަދޫ ދާއިރާއަށް ވާދަކުރެއްވުމަށް ނިންމަވާފައިވާ ކަމުގައި، ސްޕެޝަލް އެޑްވައިޒަރ ޓު ދަ ޕްރެޒިޑެންޓް، ޢަބްދުއްރަޙީމް ޢަބްދުﷲ ހާމަކުރައްވައިފިއެވެ.

އަބުދުއްރަހީމް ފޮނަދޫ ދާއިރާއަށް ވާދަކުރައްވާނެކަން މިއަދު އިޢުލާނު ކުރެއްވި އިރު، އެދާއިރާގެ މެމްބަރު މޫސާ ސިރާޖު ޕީޕީއެމްއަށް ސޮއެކުރެއްވީ، ހުސްވި ސެޕްޓެމްބަރު މަހުގެ، 26 ވަނަ ދުވަހުގައެވެ.

ޢަބުދުއްރަހީމް އެންމެ ފުރަތަމަ ރައްޔިތުންގެ މަޖިލީހަށް އިންތިޚާބުވެފައި ވަނީ ވެސް ފޮނަދޫ ދާއިރާއަށެވެ. 18 ވަނަ ރައްޔިތުންގެ މަޖިލީހުގައި އަބުދުއްރަހީމް ވަނީ ފޮނަދޫ ދާއިރާގެ ގޮނޑި ފުރުއްވާފައެވެ. އަދި 19 ވަނަ ރައްޔިތުންގެ މަޖިލިސް އިންތިޚާބުގައި އެމްޑީޕީގެ ޓިކެޓްގައި ނުކުންނަވައި، ޢަބުދުއްރަހީމްގެ މައްޗަށް ކުރި ހޯއްދެވީ، މިހާރު ޕީޕީއެމްގެ މެމްބަރެއްގެ ގޮތުގައި ހުންނެވި މޫސާ ސިރާޖެވެ.

ބެލެވޭ ގޮތުގައި އަބުދުއްރަހީމް އެދާއިރާއަށް ނުކުތުމަށް މިނިންމެވީ، ރައްޔިތުންގެ މަޖިލީހުގެ ވީހާވެސް ގިނަ ގޮނޑިތަކެއް ޕީޕީއެމް ޕީއެންސީއަށް ކާމިޔާބު ކުރުމުގެ ގޮތުން، ފޮނަދޫ ދާއިރާގެ ގޮނޑި ޕީއެންސީއަށް ކަށަވަރު ކުރެއްވުމަށްޓަކައެވެ.