ކުރީ ސަރުކާރުން ރާއްޖޭގެ ޤައުމީ ސަލާމަތާއި ދާޚިލީއަމަނަށް ނުރައްކާވާގޮތަށް އަމަލުކޮށްފައިވާ ކަމަށް ބުނެ މިހާރުގެ ސަރުކާރުގައި ހިމެނޭ ފަރާތްތަކުން ކޮށްފައިވާ ތުހުމަތުތަކާއި ގުޅޭ ގޮތުން އިންކުއަރީއެއް ހެދުމަށް ރައްޔިތުންގެ މަޖިލީހުން ފާސްކޮށްފިއެވެ.

ނިމިދިޔަ ދިވެހިރައްޔިތުންގެ ޑިމޮކްރެޓިކް ޕާޓީގެ ސަރުކާރުގެ ސިޔާސަތުތަކުގެ ސަބަބުން ގައުމީ ސަލާމަތަށް އަސަރުކޮށްފައިވާކަމަށް ބުނެ ކޮށްފައިވާ ތުހުމަތުތަކުގެ ޙަޤީޤަތް ދެނެގަނެ ރައްޔިތުންނަށް ހާމަކުރުމުގެ ގޮތުން ޕަބްލިކް އިންކުއަރީއެއް ހިންގުމަށް ރައްޔިތުންގެ މަޖިލީހަށް ޤަރާރެއް ހުށައެޅުއްވީ، ތިނަދޫ އުތުރު ދާއިރާގެ މެންބަރު ޢަބްދުލްމުޣުނީއެވެ. މިޤަރާރު ރައްޔިތުންގެ މަޖިލީހުގެ މިއަދުގެ ޖަލްސާއިން ފާސްކުރައްވާފައި ވަނީ، ވޯޓުގައި ބައިވެރިވެވަޑައިގެންނެވި 56 މެމްބަރުންގެ ތެރެއިން 53 މެމްބަރުންގެ އިއްތިފާޤުންނެވެ.

އިންކުއަރީއެއް ހެދުމަށް އެ ޤަރާރުގައި ގޮވާލާފައި ވަނީ، ރާއްޖޭގައި ހަތިޔާރު އެޅި އެތައްހާސް އިންޑިއާ ސިފައިންނެއް ތިބި ކަމަށާއި، ޗާގޯސް މައްސަލައިގައި ރާއްޖެއިން ކަނޑު ވިއްކާލީ ކަމަށް ބުނެ ކޮށްފައިވާ ތުހުމަތު ތަކާއި ގުޅޭ ގޮތުންނެވެ.

މިސަރުކާރަށް މަހެއް ވުމާއި ގާތްވެފައިވާއިރު، ޗާގޯސް ކަނޑުގެ މައްސަލައިގައި މިހާރު މިސަރުކާރުގައި ތިއްބެވި ސިޔާސީ އިސްފަރާތްތަކުން އިދިކޮޅުގައި ތިބެ ކުރި ތުހުމަތުތަކަކީ ހަޤީޤަތެއްކަން އެފަރާތްތަކުން ސާބިތުކޮށްދީފައެއް ނުވެއެވެ. މީގެ އިތުރުން ރާއްޖޭގައި ތިބި އިންޑިއާ ސިފައިންގެ ސާފު އަދަދެއް އަދިވެސް ނޭނގޭކަމަށް ސަރުކާރުން ދަނީ ބުނަމުންނެވެ.