Advertisement
ރައީސް ޔާމީން ޕީއެންއެފްއިން ރޭ ބޭއްވި ބައްދަލުވުމުގައި ބައިވެރިވެވަޑައިގެންނެވުން ---
ރައީސް ޔާމީނު ސިޔާސީ ކަންކަމުގައި ބައިވެރިވާތީ އެކަން ކަރެކްޝަންސްއިން ބަލަންފަށައިފި
ޖަލުހުކުމެއްގައި ހުންނެވި ކުރީގެ ރައީސް ޢަބުދުﷲ ޔާމީން ސިޔާސީ ހަރަކާތްތަކުގައި ބައިވެރިވާ މައްސަލަ ބަލަންފަށާފައިވާ ކަމުގައި މޯލްޑިވްސް ކަރެކްޝަނަލް ސަރވިސް އިން ބުނެފިއެވެ.
އެސަރވިސް އިން ބުނީ ރައީސް ޔާމީނު ސިޔާސީ ހަރަކާތްތަކުގައި ބައިވެރިވަމުން އަންނަކަން އެސަރވިސްގެ ސަމާލުކަމަށް އައިސްފައިވާ ކަމަށާއި އެކަބަލަމުންދާ ކަމަށެވެ. އެހެންނަމަވެސް އެކަމާއި ގުޅޭ ގޮތުން އިތުރު ތަފްސީލެއް ކަރެކްޝަންސްއަކުން ނުދެއެވެ.
ކަރެކްޝަންސްގެ މީޑިއާ އޮފިސަރު ވިދާޅުވީ، ސިޔާސީ ޕާޓިީއަކަށް ސޮއެކޮށް ޕާޓީއެއްގެ އާއްމުމެމްބަރެއްގެ ގޮތުގައި ހުރުމަށް ހުރަހެއް ނެތް ކަމަށާއި އެހެން ނަމަވެސް ސިޔާސީ ހަރަކާތްތަކުގައި ބަންދެއްގައި ހުންނަ މީހަކު ބައިވެރިވުމަކީ ކުުރެވޭނެކަމެއް ނޫންކަމަށެވެ.
ރައީސް ޔާމީން ވަނީ، އެމަނިކުފާނު އިސްވެ ހުންނަވައި އުފައްދަވާ ސިޔާސީ ޕާޓީ ޕީއެންއެފްއަށް ސޮއެކުރައްވައި އެޕާޓީގެ އޮފީހުގައި ރޭ ކުރިޔަށް ގެންދިޔަ ބައްދަލުވުމުގައި ބައިވެރިވެވަޑައިގެންފައެވެ. އެބައްދަލުވުން މީޑިއާތަކުން ވަގުތުން ދުރަށް ބްރޯޑްކާސްޓް ކުރަމުންވެސް ގެންގޮސްފައިވެއެވެ.
ރައީސް ޔާމީނުގެ މައްޗަށް ކޮށްފައިވާ، 11 އަހަރުގެ ޖަލުހުކުމަކީ އެމަނިކުފާނުގެ މައްޗަށް މަނީލޯންޑަރިންނާއި ރިޝްވަތުގެ ކުށް ސާބިތުވެގެންކޮށްފައިވާ ހުކުމެކެވެ.
ރައީސް ޔާމީނު މާފުށީ ޖަލުން، ގޭބަންދަށް ބަދަލުކުރީ،
އޮކްޓޫބަރު މަހުގެ 1 ވަނަ ދުވަހުގައެވެ.
އޭގެ ފަހުން އެމަނިކުފާނުގެ ގޭބަންދު ވަނީ މާލެ ބަންދަކަށް ބަދަލުކޮށްފައެެވެ. އެހެން ނަމަވެސް އަދިވެސް އެމަނިކުފާނުގެ މައްޗަށް ކޮށްފައިވާ ޙުކުމް ދެމި އޮތުމާއިއެކު ކަރެކްޝަންސް އެމަނިކުފާނު މާލެ ބަންދަށް ދޫކޮށްފައިވާ އުސޫލުތަކާއި ޚިލާފުވެވަޑައިގެންނެވުމަކީ، ކަންބޮޑުވުމެއްގެ ގޮތުގައި ސަރުކާރަށް ތާއީދު ކުރާ ބައެއް ފަރާތްތަކުންވެސް ފާހަގަކޮށްފައިވެއެވެ.
