އެމްޑީޕީ ސަރުކާރުގައި ހުޅުމާލޭ މުނިސިޕަލް ޚިދުމަތްތައް ސިޓީކައުންސިލްގެ ދަށަށް ބަދަލުކުރުމަށް ހުށައެޅި ގޮތާއި ދެކޮޅު ހެއްދެވީ، އޭރުގެ މާލޭ ސިޓީގެ މޭޔަރު އަދި މިހާރުގެ ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ކަމުގައި، ރައްޔިތުންގެ މަޖިލީހުގެ ހުޅުމާލެ ދާއިރާގެ މެމްބަރު، ޢަލީ ނިޔާޒް ވިދާޅުވެއްޖެއެވެ.

ޢަލީ ނިޔާޒް މިހެން ވިދާޅުވީ، ‏މާލޭ ސިޓީ މޭޔަރ އަދި ކައުންސިލްގެ ހުސްވެފައިވާ 3 ދާއިރާއަށް ވާދަކުރައްވާ އެމްޑީޕިގެ ކެންޑިޑޭޓުންގެ ކެމްޕޭން ރަސްމީކޮށް ފެށުމުގެ ގޮތުން ފެހި ތަނަވަސް މާލެ ނަމުގައި ރޭ ބޭއްވި ޖަލްސާގައި ދެއްކެވި ވާހަކަފުޅުގައެވެ.

ޢަލީ ނިޔާޒްގެ ވާހަކަފުޅުގައި ވިދާޅުވީ، ހުޅުމާލޭގެ މުނިސްޕަލް ޚިދުމަތްތައް ސިޓީ ކައުންސިލްގެ ދަށަށް ގެނައުމަށް ސަރުކާރުން ބޭނުންވި ކަމަށެވެ. އަދި އެކަމުގައި އެއްބަސްވުންތައްވެސް ބަދަލުކުރެވުނު ކަމަށާއި، އަދި ކަންކަމުގައި މަސައްކަތް ކުރާނެ މޮޑެލްތަކުގެ ވާހަކަވެސް ދެކެވުނު ކަމުގައި ޢަލީ ނިޔާޒް ވިދާޅުވިއެވެ. 

ޢަލީ ނިޔާޒް ވިދާޅުވީ، މިހާރުގެ ސަރުކާރުންވެސް ހުޅުމާލޭގެ މުނިސްޕަލް ޚިދުމަތްތައް ސިޓީ ކައުންސިލްގެ ދަށަށް ބަދަަލު ކުރުމަށް މަސައްކަތް ކުރަމުން ދަނީ، ކުރިން އެބޭފުޅުން އެކަމަށް ދެކޮޅު ހެއްދެވި އަދިި އެމްޑީޕީ ސަރުކާރުން އެކަން ކުރުމަށް ހުށައެޅި ގޮތަށް ކަމުގެ މައުލޫމާތު ލިބިފައިވާ ކަމަށެވެ. ޢަލީ ނިޔާޒު ވިދާޅު އެކަމަށް އެމްޑީޕީ ސަރުކާރުން ހުށައެޅި ހައްލު ނޫން ހައްލެއް އޮތްކަމަށް ދެކެވަޑައި ނުގަންނަވާ ކަމަށެވެ.

މިގޮތުން ހުޅުމާލޭގެ ކަންކަން މާލޭ ސިޓީ ކައުންސިލްގެ ދަށަށް ބަދަލުކުރުމުގައި ބޮޑެތި ގޮންޖެހުންތަކާއި މާލީ ބުރަތަކެއް އޮތްކަން ޢަލީ ނިޔާޒް ފާހަގަކުރެއްވިއެވެ. އެގޮތުން އާބަންކޯއިން ހުޅުމާލޭގެ ބިންތައް ރަހުނުކޮށް ބޮޑެތިއަދަދުތަކުން ލޯނު ނަގާފައި އޮތުމާއި، މިހާރު މުނިސިޕަލް މަސައްކަތްތައް ކުރާ އާބަންކޯގެ މުވައްޒަފުން ކައުންސިލްގެ ދަށަށް ބަދަލުވެގެން ދާއިރު، މުސާރަތައް ކުޑަވެގެން ދިޔުމުގެ މަސައްލަވެސް ޢަލީ ނިޔާޒް ފާހަގަކުރެއްވިއެވެ.

ހުޅުމާލޭގެ މުނިސިޕަލްކަންކަން މާލެ ސިޓީގެ ދަށަށް ބަދަލުކުރުމަކީ، ރައީސް ޑރ. މުޙައްމަދު މުޢިއްޒުވެސް ވަޢުދުވެވަޑައިގެންފައިވާ ކަމެއް ކަމަށެވެ.