އިންގްލިޝް ޕްރިމިއަރ ލީގުގައި ހޮނިހިރު ދުވަހުގެރޭ ވިލާ ޕާކުގައި އެސްޓަން ވިލާ އިން، މި ސީޒަނުގައި ތައްޓަށް ވާދަކުރަމުން އަންނަ އާސެނަލް ވެސް ބަލިކޮށްފިއެވެ. ވިލާ އިން ވަނީ މީގެ ތިން ދުވަސް ކުރިން އެންމެ ފަހުގެ ޗެމްޕިއަން މެންޗެސްޓަރ ސިޓީ ވެސް ވިލާ ޕާކުގައި ބަލިކޮށްފައެވެ.

ލީގުގައި މިހާތަނަށް 16 މެޗު ކުޅުނު އިރު އެސްޓަން ވިލާ އިން ވަނީ 35 ޕޮއިންޓު ހޯދާފައެވެ. މި ސީޒަންގައި އެ ޓީމު ކުޅެމުން އަންނަ ފޯމުގައި އެންމެ ފަހުން ފެނިގެން ގޮސްފައިވަނީ 1980/81 ސީޒަންގައެވެ. އަދި އެ ސީޒަންގައި ވިލާ އިން ވަނީ ލީގު ކާމިޔާބުކޮށްފައެވެ.

އާސެނަލްއާ ދެކޮޅަށް ހޯދި މޮޅާއެކީ އެސްޓަން ވިލާއިން މި ވަނީ އަމިއްލަ ދަނޑުގައި ބަލިނުވެ 15 މެޗު ހަމަކޮށްފައެވެ. މިއީ ކުލަބު ތާރީޙުގައި ރެކޯޑެކެވެ. މި ނޫނަސް މި ސީޒަނުގައި އެ ޓީމުން އަންނަނީ ތާރީހުގެ އައު ޞަފްޙާތަކެއް ލިޔަމުންނެވެ.  

އާސެނަލް ކޮޅަށް އެސްޓަން ވިލާއިން ކާމިޔާބު ކުރި ގޯލު ޖެހި ފުރުސަތު ތަނަވަސްކޮށްދިނީ، ސިޓީގެ ގޯލު ފޫއަޅުވާލި ލިއޯން ބެއިލީއެވެ. ބެއިލީ ބޯޅަ ހިފައިގެން ގޯލު އޭރިއާ ތެރެއަށް ވަނުމަށްފަހު ހުރަސްކޮށްދިން ބޯޅަ ގޯލުގެ ތެރެއަށް ފޮނުވާލީ ސްކޮޓިޝް ފޯވާޑް ޖޯން މެކިންއެވެ.

މި މެޗަކީ މި ސީޒަނުގައި އެންމެ ގިނަ ޓެކުލްތައް ވެސް ފެނިގެން ގޮސްފައިވާ މެޗެވެ. އެގޮތުން މެޗުގައި ޖުމްލަ 63 ޓެކުލް ފެނިގެން ދިޔައިރު، އެސްޓަންވިލާއިން ވަނީ 32 ޓެކުލް އަދި އާސެނަލް އިން ވަނީ 31 ޓެކުލްކޮށްފައެވެ.