Advertisement
އާދަމް އާޒިމް އާއްމުންނާއި ބައްދަލުކުރެއްވުން ---
މަސްމާރުކޭޓް ސަރަހައްދަކީވެސް ރީތި، ނަލަ ތާކަށް ވާންޖެހޭ: އާޒިމް
މާލޭގެ މޭޔަރު ކަމުގެ މަޤާމަށް އިންތިޚާބުވެވަޑައިގެންފި ނަމަ، މާލޭގެ މަސްމާރުކޭޓް ސަރަހައްދަކީ ރީތި ނަލަ ސަރަހައްދަކަސް ހައްދަވައި ދެއްވާނެ ކަމުގައި، އެމްޑީޕީގެ ޓިކެޓްގައި މާލޭގެ މޭޔަރުކަމަށް ވާދަކުރައްވާ އާދަމް އާޒިމް ވިދާޅުވެއްޖެއެވެ.
އާޒިމް މިހެންވިދާޅުވީ، މިއަދު ފާހަގަކުރާ ދިވެހިރާއްޖޭގެ މަސްވެރިންގެ ދުވަހުގެ މުނާޞަބަތުގައި ރާއްޖޭގެ މަސްވެރިންނަށް ދުވަހުގެ ތަހުނިޔާ އާއި ހެޔޮއެދުންތައް ފޮނުއްވައި އެކްސްގައި ކުރެއްވި ޕޯސްޓްގައެވެ.
އާޒިމް ވިދާޅުވީ، މަސްމާރުކޭޓް ސަރަހައްދަކީވެސް ރީތި، ނަލަ ތާކަށް ވާންޖެހޭކަމަށާއި، މަސްވެރިންނަށާ މަސްކަނޑާދޭ މީހުނަށް ފެންވަރާލާ، ނަލަވެލެވޭނެ ގޮތެއް އޮންނަން ޖެހޭނެ ކަމަށެވެ. އަދި މާލޭގެ މޭޔަރުގެ މަޤާމަށް އާޒިމް އިންތިޚާބުކޮށްފިނަމަ އެކަންކަން ފުރިހަމަކޮށްދެއްވާނެ ކަމުގައި އާޒިމް ވަނީ ވިދާޅުވެފައެވެ.
މާލޭ ސިޓީގެ މޭޔަރުކަމަށް ވާދަކުރައްވާ އާދަމް އާޒިމް ---
އެމްޑީޕީގެ ޓިކެޓުގައި އާޒިމް މާލޭ ސިޓީގެ މޭޔަރު ކަމުގެ މަޤާމަށް ވާދަކުރައްވާއިރު، އާޒިމްއާއެކު ދެން މިއިންތިޚާބުގައި ވާދަކުރައްވަނީ، ޕީޕީއެމް ޕީއެންސީގެ ޓިކެޓުގައި ވާދަކުރައްވާ ކުރީގެ ބަންޑާރަނައިބު އައިޝަތު އާޒިމާ ޝުކޫރާއި، ރައީސް ޔާމީނު އަލަށް އުފައްދަވާ ޕާޓީ ޕީއެންއެފްގެ ޓިކެޓްގައި ވާދަކުރައްވާނެކަމަށް ބެލެވޭ، ކުރީގެ ކޮމިޝަނަރ އޮފް ޕޮލިސް ހުސައިން ވަހީދު އަދި ޑިމޮކްރެޓްސްގެ ޓިކެޓުގައި މުހައްމަދު ސައިފް ފާތިހުއެވެ.
