މި ސަރުކާރުގެ ވަޒީރުންގެ މަޖިލީހުގެ ފުރަތަމަ ޖަލްސާގައި ހުށަހެޅުއްވި ފުރަތަމަ ކަރުދާހަކީ، އަދި ވަޒީރުންގެ މަޖިލީހުން ފުރަތަމަ ނިންމެވި ނިންމެވުމަކީވެސް މަސްވެރިކަމާ ގުޅުންހުރި ނިންމެވުމެއް ކަމުގައި, މިނިސްޓަރ އޮފް ފިޝަރީޒް އެންޑް އޯޝަން ރިސޯސް އަޙްމަދު ޝިޔާމް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، މަސްވެރިންގެ ދުވަހާއި ގުޅިގެން، މިނިސްޓްރީ އޮފް ފިޝަރީޒް އެންޑް އޯޝަން ރިސޯސްއިން އިންތިޒާމްކޮށްގެން ބޭއްވި މަސްވެރިންގެ ގުންޒަރުގައި ހޮނިހިރު ދުވަހުގެ ރޭ ވާހަކަފުޅު ދައްކަވަމުންނެވެ.

ޝިޔާމް ވިދާޅުވީ، މަސްވެރިކަމުގެ ސިނާޢަތަކީ ސަރުކާރުން ޚާއްޞަ އަހައްމިއްޔަތުކަމެއް ދެއްވާ ސިނާޢަތެއް ކަމަށެވެ. އަދި މިރޭ ބާއްވާ، ދުވަހުގެރޭ ބާއްވަވާ މަސްވެރިންގެ ދުވަހުގެ ރަސްމީ ޖަލްސާގައި، މަސްވެރިކަމުގެ ދާއިރާއަށް މުހިންމު ގިނަ ކަންތައްތަކެއް ރައީސުލްޖުމްހޫރިއްޔާ އިޢުލާން ކުރައްވާނޭކަމުގައިވެސް ޝިޔާމް ވިދާޅުވިއެވެ.

މިސަރުކާރުގެ ވަޒީރުންގެ މަޖިލީހުން ނިންމި އެންމެ ފުރަތަމަ ނިންމުމަކީ، އެސްޓީއޯގެ ދަށުން މިފްކޯ ވަކިކޮށް ސަރުކާރުގެ %100 ހިއްސާވާ ވަކި ކުންފުންޏެއްގެ ގޮތުގައި މިފްކޯ އިން ހިންގުމެވެ. މިފްކޯ އެސްޓީއޯގެ ދަށަށް ބަދަލުކުރީ ރައީސް ޔާމީނުގެ ސަރުކާރުގެ ދުވަސްވަރުގައި، 2016 ވަނަ އަހަރުގައެވެ.