އަންނަ އަހަރުގެ މާޗު މަސް ނިމެންދެން،  އިންޑިއާއިން ފިޔާ އެކްސްޕޯޓް ކުރުން އެޤައުމުގެ ސަރުކާރުން މަނާކޮށްފިއެވެ.

އިންޑިއާއިން ފިޔާ އެކްސްޕޯޓު ކުރުން  މަނާކޮށްފިކަން، ޑިރެކްޓާ ޖެނެރަލް އޮފް ފޮރިން ޓްރޭޑް (ޑީޖީއެފްޓީ) އިން ހާމަކޮށްފައި ވަނީ ބުރާސްފަތި ދުވަހުގައެވެ. އިންޑިއާގެ ނޫހެއް ކަމުގައިވާ ދަ އިންޑިއާން އެކްސްޕްރެސްގައި ރިޕޯޓްކޮށްފައިވާ ގޮތުގައި، އިންޑިއާ ސަރުކާރުން މި ނިންމުން ނިންމާފައި މިވަނީ، 2024 ވަނަ އަހަރު އެޤައުމުގައި ބާއްވާ އާއްމު އިންތިޚާބުގެ ވޯޓުލުމާއި ދިމާކޮށް އިންފްލޭޝަން ދަށްކުރުމުގެ ގޮތުންނެވެ. މިގޮތުން ޖެނުއަރީ 5 އިން ފެށިގެން މާރިޗް 31 ގެ ނިޔަލަށް އިންޑިއާއިން ފިޔާ އެކްސްޕޯޓް ކުރުން މުޅިން މަނާވާނެއެވެ. އަދި ޑިސެމްބަރު 8 ވަނަ ދުވަހުން ފެށިގެން ޖެނުއަރީ 5 ވަނަ ދުވަހާއި ހަމައަށް ވަކި ޝަރުޠުތަކަކާއި ހަމަތަކުގެ ތެރެއި ފިޔާ އެކްސްޕޯޓް ކުރެވޭނެ ކަމުގައި އިންޑިއާ ސަރުކާރުން ހާމަކޮށްފައިވެއެވެ.

ދިވެހިރާއްޖެއަށް ބޭނުންވާ ފިޔާ އެންމެ ގިނައިން ގެންނަނީ އިންޑިއާއިން ކަމަށްވުމާއި އެކު އަދި އިންޑިއާ އާއި ރާއްޖޭގެ ގުޅުން މިސަރުކާރާއި އެކު ގޯސްވެފައި ވާއިރު، ރާއްޖެއަށް ފިޔާ ލިބުމުގައި ދަތިތައް ކުރިމަތވާނެކަން ބެލެވެއެވެ.