އިންގްލިޝް ޕްރިމިއަރ ލީގުގައި ބުރާސްފަތި ދުވަހުގެރޭ އެވަޓަން އާއި ނިއުކާސްލް ބައްދަލުކުރި މެޗު 3-0 އިން އެވަޓަން ކާމިޔާބުކޮށް، ރެލިގޭޝަން ޒޯނުން އެ ޓީމު ބޭރުވެއްޖެއެވެ. އެވަޓަންގެ ގުޑިސަން ޕާކުގައި ކުޅުނު މި މެޗުން ލިބުނު 3 ޕޮއިންޓާއެކީ މިހާރު އެ ޓީމަށް ޖުމްލަ 10 ޕޮއިންޓު ލިބިފައިވެއެވެ. 

ނިއުކާސްލްއަށް ލީޑު ނެގުމަށް ރަގަޅު ފުރުސަތުތަކެއް ލިބުނެވެ. އެގޮތުން މެޗުގެ ކުރީކޮޅު، ކިރަން ޓްރިޕިއާ ފޮނުވާލި ހިލޭޖެހުން ފާހަގަކޮށްލެވެއެވެ. މި ހިލޭޖެހުންވަނީ ޕިކްފޯޑް ދިފާއު ކޮށްފައެވެ. މީގެ އިތުރުން މިގުއެލް އަލްމިރޯން، އެލެކްސެންޑަރ އިސާކް އަދި އެންތޮނީ ގޯޑަންއަށް ވެސް ވަނީ ރަގަޅު ފުރުސަތުތަކެއް ލިބި، ބޭކާރުވެފައެވެ.

އެވަޓަންގެ ގޯލުތައް ފެނިގެން ދިޔައީ މެޗު ނިމެން ކައިރިވެފައިވަނިކޮށެވެ. އެގޮތުން މެޗުގެ ފަހުކޮޅަށް އައިއިރު ކޮންސެންޓްރޭޝަން ގެއްލިފައިހުރި ޓްރިޕިއާއަށް ހެދުނު ގޯސްތަކުގެ ބޭނުން ހިފައި އެވަޓަންއިން ވަނީ މެޗު އަނބުރާލާފައެވެ. އެ ޓީމުގެ ފުރަތަމަ ގޯލު ކާމިޔާބުކުރީ މެޗުގެ 79 ވަނަ މިނެޓުގައި ޑްވައިޓް މެކްނީލްއެވެ. އަދި ދެވަނަ ގޯލާއި ތިންވަނަ ގޯލު ކާމިޔާބުކޮށްދިނި މެޗުގެ 86 ވަނަ މިނެޓުގަ އާއި އިތުރު ވަގުތުގެ 6 ވަނަ މިނެޓުގައި އަބްދުއްލައި ޑޮކޯރޭ އަދި ބެޓޯއެވެ.

މި މެޗުން ބަލިވުމުން، މެންޗެސްޓަރ ޔުނައިޓެޑާއި ޓޮޓްނަމް ހޮޓްސްޕާއަށް ވުރެން މައްޗަށް، ލީގުގެ 5 ވަނައަށް ޖެހިލުމަށް ނިއުކާސްލްއަށް ލިބުނު ފުރުސަތު މިވަނީ ބޭކާރުވެފައެވެ. މި މެޗަށް ނިކުތް އިރު އެ ޓީމަށް އޮތް އެންމެ ބޮޑު ގެންޖެހުމަކަށްވީ، އެ ޓީމުގެ އެއް ނަންބަރު ކީޕަރަށް އަނިޔާވެ ކުޅުމާ ދުރަށް ދާން ޖެހިފައި ވުމެވެ.