ޙަޤީޤަތުގައި ކޮރަޕްޝަނަކީ ދިވެހީންނާއި އަދި ދިވެހީންގެ ރާއްޖެއާ ވަރަށް ބީރައްޓެހި އެއްޗެއްކަމުގައި ރައީސުލްޖުމްހޫރިއްޔާ،  ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، މިއަހަރުގެ ބައިނަލްއަޤްވާމީ އެންޓި-ކޮރަޕްޝަން ދުވަސް ފާހަގަކުރުމަށް ބޭއްވި ޖަލްސާގައި ވާހަކަފުޅު ދައްކަވަމުންނެވެ. މިޖަލްސާ އޮތީ މިއަދު ހެނދުނު ދަރުބާރުގޭގައެވެ.

ރައީސުލްޖުމްހޫރިއްޔާގެ ވާހަކަފުޅުގައި ވިދާޅުވީ، ދިވެހި ތާރީޚުގެ ފަތްފުށްތަކަށް ބަލައިލުމުން، ކޮރަޕްޝަނަކީ ދިވެހިންނާއި ބީރައްޓެހިއެއްޗެއްކަން ފެންނަ ވަރަށް ރީތި މިސާލުތައް ހުރިކަމަށެވެ. އެހެން ނަމަވެސް އެމަނިކުފާނު މޭރުން ކުރައްވާ އެކަމުގެ މާނައަކީ، ފަހަރެއްގައިވެސް ރާއްޖެގައި ދެރަ ކަންތަކާއި ގޯސްކަންތައް ހިނގާފައި ނެތް ވާހަކަ ނޫންކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ، ޝައްކެއްނެތް ގޮތުގައި ދިވެހިރާއްޖެ ކުރިއަރައިދާނީ އެފަދަ ނަމޫނާ ސިފަތަކުންކަމަށެވެ. އަދި ދިވެހީންނާމެދު ބޭރު މީހުންގެ ހިތުގައި އިތުބާރު އުފެދޭނީ ރީތި އަޚްލާޤާއި، ތަހުޒީބު ދިރިއުޅުމަކުން ކަމަށާއި ރާއްޖޭގެ ފަތުރުވެރިކަމަށް އަދި އެނޫންވެސް ދާއިރާތަކަށް ބޭނުންވާ އިންވެސްޓްމަންޓްތައް ލިބޭނީ މިކަންކަން އާލާކުރެވި، ބޭރު ދުނިޔޭގެ އިތުބާރު ހޯދިގެން ކަމުގައި ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ، ކޮރަޕްޝަނާ ދެކޮޅަށް މަސައްކަތްކުރުމަކީ ޤައުމީ މަސައްކަތަކަށް ހަދަންޖެހޭ ކަމަށާއި އެއީ، ދިވެހި ޤައުމަށްޓަކައި ކުރާ ކަމަކަށްވާންޖެހޭ ކަމަށެވެ. އަދި އެއީ ދިވެހީންގެ ސަލާމަތަށްޓަކައި ކުރެވޭ ކަމަކަށްވެސް ވާންޖެހޭ ކަމަށާއި ދިވެހީންގެ ފުދުންތެރިކަމަށްޓަކައި ކުރެވޭ ކަމަކަށް އަދި ފަޚްރުވެރި ދިވެހި ޤައުމުގެ އަބުރާއި ޢިއްޒަތަށްޓަކައި ކުރެވޭ ކަމަކަށްވެސް ވާންޖެހޭ ކަމުގައި ރައީސުލްޖުމްހޫރިއްޔާ ވިދާޅުވިއެވެ.

ޙަޤީޤަތުގައި ކޮރަޕްޝަނަކީ ދިވެހީންނާއި އަދި ދިވެހީންގެ ރާއްޖެއާ ވަރަށް ބީރައްޓެހި އެއްޗެއްކަމުގައި ރައީސުލްޖުމްހޫރިއްޔާ ވިދާޅުވިއިރު، ފާއިތުވި އަހަރުތަކުގައި ރާއްޖޭގައި ކޮރަޕްޝަންތައް ހިނގާފައިވާ މިންވަރު ވަނީ ވަރަށް ބޮޑަށް އިތުރުވެފައެވެ. އަދި ބޮޑެތިކޮރަޕްޝަންތަކުގެ އިތުރުން ކުދިކުދި ކަންކަމާއި ހަމައަށްވެސް ކޮރަޕްޝަންގެ އަމަލުތައް ފެތުރި ރާއްޖޭގައި ކޮރަޕްޝަން އާއްމު ވެފައިވާ ކަމުގައި ދިރާސާކުރާ ފަރާތްތަކުން ފާހަގަކޮށްފައިވެއެވެ.