ކުރިޔަށް ހުރި އިންތިޚާބުތަކުގައި އެމްޑީޕީއާ ޖުމްހޫރީޕާޓީން ގުޅިގެން ކުރިޔަށްދިޔުމާއި ގުޅޭ ގޮތުން ދެޕާޓީގެ މެދުގައި މަޝްވަރާކޮށްފިއެވެ.

އެމްޑީޕީން ބުނީ، އިންތިހާބުތަކުގައި ގުޅިގެން މަސައްކަތްކުރެވިދާނެ ގޮތްތަކާ ގުޅޭގޮތުން މަޝްވަރާކުރުމަށް ދެ ޕާޓީގެ އިސްބޭފުޅުން އިއްޔެ ބައްދަލުކޮށްފައިވާ ކަމަށެވެ.

މި ބައްދަލުވުމުގައި ދެ ޕާޓީގެ ވާހަކަތަކަށް ފަހު, ކުރިއަށް ހުރި އިންތިހާބު ތަކުގައި ދެ ޕާޓީ ގުޅިގެން ކުރެވިދާނެ ކަންކަން ދެނެގަތުމަށްޓަކައި އިތުރު ބައްދަލުވުންތައް ބޭއްވުމަށް ވެސް ވަނީ ނިންމާފައި ކަމުގައި އެމްޑީޕީން ވަނީ ބުނެފައެވެ.

ޖުމްހޫރީ ޕާޓީއަކީ 2015 އަހަރުން ފެށިގެން އެމްޑީޕީއާއެކު ގައުމަށް ދިމާވާ މުހިއްމު ދަނޑިވަޅުތަކުގައި ސިޔާސީ ގިނަ މަސައްކަތްތަކެއް އެކުގައި ކޮށްފައިވާ ޕާޓީއެއްކަން އެމްޑީޕީން ފާހަގަކޮށްފައި ވެއެވެ. އަދި 2018 ވަނަ އަހަރު އުފެދުނު އެމްޑީޕީގެ ސަރުކާރުގައި ކޯލިޝަން ޕާޓްނަރެއްގެ ގޮތުގައި ދައުރު ނިމުމާ ހަމައަށް އެއްބާރުލުންދީ ރައްޔިތުންނަށް ފައިދާހުރި ސިޔާސަތުތައް ތަންފީޒުކުރުމުގެ ބައިވެރިއެއްގެ ގޮތުގައި އެޕާޓީން ހަރަކާތްތެރިވިކަންވެސް އެމްޑީޕީން ފާހަގަކޮށްފައިވެއެވެ.