ފެނަކަ ކޯޕަރޭޝަންގެ ދާއިމީ ވަޒީފާތަކުގައި ތިބި އެއްވެސް މީހަކު ވަޒީފާއިން ވަކި ނުކުރާކަމަށާއި، ކުންފުނިން ދޫކޮށްލުމަށް ނިންމާފައި ވަނީ، ކޮންޓްރެކްޓް މުއްދަތު ހަމަވާ މުވައްޒަފުންކަމުގައި ފެނަކަ ކޯޕަރޭޝަނުން ބުނެފިއެވެ.

ފެނަކަ ކުންފުނީގެ އައު މެނޭޖްމަންޓުން އެކުންފުނީގެ ގިނައަދަދެއްގެ މުވައްޒަފުންތަކެއް ވަޒީފާއިން ވަކިކުރަމުންދާ ކަމަށްބުނެ ސިޔާސީ ފަރާތްތަކުންނާއި މީޑިއާތަކުން ފަތުރަމުންދާ ވާހަކަތައް ދޮގުކޮށް އެކުންފުނިން ނެރެފައިވާ ބަޔާނުގައި ބުނެފައި ވަނީ، އެކުންފުނީގެ ދާއިމީ މުވައްޒަފުންގެ ތެރޭގައި ހިމެނޭ އެއްވެސް މުވައްޒަފަކު ވަޒީފާއިން ވަކި ނުކުރާ ކަމަށާއި، ކުންފުނީގެ އައު މެނޭޖްމަންޓުން ނިންމާފައި ވަނީ ކޮންޓްރެކްޓް މުވައްޒަފުންގެ ތެރެއިން، ކޮންޓްރެކްޓްގެ މުއްދަތު ހަމަވާ މުވައްޒަފުން ދޫކޮށްލުމަށް ކަމަށެވެ. މިގޮތުން ކޮންޓްރެކްޓް މުވައްޒަފުންގެ ތެރެއިން ދޫކޮށްލުމަށް ނިންމި މުވައްޒަފުންނަކީ، އެމުވައްޒަފުން ނަގާފައިވާ ޕްރޮޖެކްޓްތަކުގެ މަސައްކަތް ނިމިފައިވާ، ނުވަތަ އެމުވައްޒަފުން ނަގާފައިވާ ޕްރޮޖެކްޓްތަކުގެ ތެރެއިން އެކި ސަބަބުތަކާއި ގުޅިގެން މަސައްކަތް ހުއްޓި ފާއިތުވި 3 މަސްދުވަހުގެ ތެރޭގައި އެއްވެސް މަސައްކަތެއް ހިނގާފައި ނުވާތަންތަނުގައި ތިބި ކޮންޓްރެކްޓް މުވައްޒަފުން ކަމުގައިވެސް އެކުންފުނިން ވަނީ ބުނެފައެވެ.

ފެނަކައިން ނެރުނު ބަޔާނުގައި އިތުރަށް ބުނެފައި ވަނީ، އަދު ކުންފުނިން ދޫކޮށްލާފައިވާ ގިނަ މުވައްޒަފުންނަކީ، 30 ނޮވެމްބަރުގެ ނިޔަލަށް ކޮންޓްރެކްޓްގެ މުއްދަތު ހަމަވާގޮތަށް ވަޒީފާއަށް ނަގާފައިވާ މުވައްޒަފުންކަމުގައިވެސް އެކުންފުނިން ވަނީ ބުނެފައެވެ.

Advertisement

ފެނަކައިން ބުނެފައި ވަނީ، އެކުންފުނިން ގިނަ އަދަދެއްގެ މުވައްޒަފުން ވަޒީފާއިން ވަކިކުރަމުންދާ ކަމަށް ބުނެ ފަތުރާ ވާހަކަތަކަކީ ސައްޙ ވާހަކަތަކެއް ނޫންކަމަށާއި، ރައްޔިތުންގެ ހިތްތަކުގައި އެކުންފުންޏާއި މެދު ނުރަގަނޅު ތަޞަވަރު އުފެދޭ ގޮތަށް ކުރާ މަސައްކަތްތައް ހުއްޓައިލުމަށް ގޮވާލާ ކަމަށެވެ.